Prestar missi tekjur af hlunnindum

Agnes M. Sigurðardóttir, biskup þjóðkirkjunnar, mælti á Kirkjuþingi fyrir tillögu sem þýðir að prestar sem taka við prestssetursjörðum eftir næstu áramót fái ekki tekjur af hlunnindum jarðanna ef þau krefjast ekki vinnuframlags þeirra.

Þá fái núverandi prestar á prestssetursjörðum óskiptar hlunnindatekjur upp að 720 þúsund krónum, viðkomandi sókn næstu 720 þúsund krónur og síðan skipta þessir aðilar tekjum umfram það til helminga.

„Lagt er til að kirkjuþing 2015 samþykki að helmingur af tekjum fyrirhafnarlítilla hlunninda af jörðum og prestssetursjörðum í eigu kirkjumálasjóðs, renni framvegis til sóknar þeirrar þar sem jörðin er, enda sé kirkja á jörðinni í umsjá sóknarinnar. Þá er sömuleiðis lagt til að þingið samþykki að þegar prestsembætti eru auglýst, sem prestssetursjörð fylgir, skuli, þar sem það á við, fyrirhafnarlítil hlunnindi undanskilin,“ segir í tillögunni sem kemur frá starfshópi sem biskup skipaði í fyrra.

Í greinargerð starfshópsins segir um núverandi fyrirkomulag að hlunnindagreiðslurnar séu barn síns tíma og eigi ekki við lengur. Þær byggi ekki á sanngirnissjónarmiðum og séu úr takti við aðra umbun á vegum opinberra aðila.

Í tillögu biskups segir að til greina gæti komið að Kirkjuþing skipaði nefnd til að fjalla sérstaklega um málið. Og það varð niðurstaðan á Kirkjuþinginu sem í gær var frestað fram til næsta árs:

„Kirkjuþing 2015 samþykkir að kirkjuráði verði falið að skipa þriggja manna starfshóp sem skoði málið í tengslum við stefnumörkun þjóðkirkjunnar um eignir og eignastýringu. Starfshópurinn hafi til hliðsjónar þær skýrslur sem unnar hafa verið um eignir þjóðkirkjunnar undanfarin ár,“ segir á ályktun Kirkjuþings.