Fór til Slóvakíu og sótti soninn: „Þarf að tryggja að þetta gerist aldrei aftur“

Ragnar Hafsteinsson, sem undanfarnar vikur hefur staðið í ströngu við að endurheimta sex ára son sinn, Adam, frá móður hans í Slóvakíu, sótti drenginn þangað til lands í vikunni. Hann er með fullt forræði fyrir drengnum en telur að nú taki við löng og ströng forræðisdeila.

Ragnar kynntist fyrrverandi sambýliskonu sinni, sem er frá Slóvakíu, árið 2004. Þeim fæddist drengur árið 2009 en ári síðar slitu þau samvistum. Bæði kröfðust þau fullrar forsjár yfir drengnum en að loknu sálfræðimati var það niðurstaða dóms að Ragnar fengi fullt forræði. Konan hafði lýst því yfir að hún hygðist flytja til Slóvakíu og var umgengni hennar ákveðin einn mánuð yfir sumarið auk jóla og páska annað hvert ár.

Sjá einnig: Býr sig undir stranga forsjárdeilu milli landa

Þeir feðgar eru nú búsettir í Noregi en drengurinn fór til móður sinnar hinn 4. október síðastliðinn. Dvöl hans átti að standa yfir í eina viku.

Móðirin komin með forræði

„Daginn áður en hann átti að koma fékk ég skilaboð um að hann væri veikur og myndi ekki koma til baka. Strax í kjölfarið var lokað á öll samskipti við mig," sagði Ragnar í Bítinu í morgun. Hann sagðist strax hafa áttað sig á hversu alvarlegt málið væru og hafði því samband við lögregluyfirvöld og innan- og utanríkisráðuneyti hérlendis og í Noregi.

„Ég komst að því í gegnum sameiginlega vini að það væri búið að melda hann inn í slóvakískan skóla. Svo fékk ég nýjar upplýsingar að hún [móðirin] hefði á einhvern ótrúlegan hátt fengið forræði fyrir drenginn þar í landi. Enginn hafði fyrir því að láta mig vita."

Ragnar leitaði að sögn aðstoðar erlendra sérfræðinga í kjölfarið. Þannig hafi hann sótt barnið, án dóms og laga.

Strákurinn tekinn

„Þegar gluggi opnaðist var strákurinn tekinn. Þetta er aðgerð sem tekur innan við mínútu og ég var á staðnum, þannig að það er ekki eins og einhverjir ókunnugir komi og taki hann. Hann fríkaði út, en ég samt á staðnum. Stærsti hlutinn af þessari aðgerð er að gera þetta án skaða fyrir barnið," segir hann.

Þeir feðgar eru nú komnir til síns heima og Ragnar segir drenginn hafa það gott. Þó séu erfiðir tímar framundan.

„Nú þarf ég að tryggja að þetta gerist aldrei aftur. Það er í rauninni stærsta baráttan."

Hlusta má á viðtalið við Ragnar í spilaranum hér fyrir neðan.