Hátt í 3000 ökumenn stöðvaðir

Tæplega 2.800 ökumenn voru stöðvaðir á höfuðborgarsvæðinu í síðasta mánuði. Um er að ræða sérstakt umferðareftirlit sem lögreglan hélt úti í umdæminu. Þetta kemur fram í tilkynningu frá lögreglunni.

Tuttugu og sjö ökumenn reyndust ölvaðir eða undir áhrifum fíkniefna en þeir eiga yfir höfði sér ökuleyfissviptingu. Níu til viðbótar var gert að hætta akstri sökum þess að þeir höfðu neytt áfengis, en voru þó undir refsimörkum.

Markmiðið með átakinu var að vekja athygli á þeirri hættu sem stafar af ölvunar- og fíkniefnaakstri og hvetja fólk til almennrar varkárni í umferðinni. Minnt var á viðvörunarorðin Eftir einn ei aki neinn en þau eiga alltaf við.