Rammi fyrir ríkisfjármál næstu fjögurra ára

Bjarni Benediktsson fjármálaráðherra mælti í vikunni fyrir ríkisfjármálaáætlun fyrir árin 2016 til 2019. Í máli ráðherra kom fram að þetta væri í fyrsta sinn sem tillaga af þessu tagi væri lögð fyrir á Alþingi og markaði því framlagningin tímamót við stjórn ríkisfjármála á Íslandi.

„Með þessu nýja vinnulagi er þingræðið eflt, enda er með þessu tryggt að Alþingi komi mun fyrr að mótun þess ramma sem fjárlagagerðinni er sniðinn því að í áætluninni birtist stefnumótandi umfjöllun sem beinist að markmiðum, meginlínum og heildarstærðum í fyrstu áföngum fjárlagaferlisins,“ sagði Bjarni.

Hann sagði áætlunina bera með sér að veruleg umskipti hefðu orðið í rekstri ríkissjóðs, jafnvægi hefði náðst og horfur væru á auknum afgangi á næstu árum. „Afkomubatinn hefur verið nýttur til að loka fjárlagagatinu og stöðva skuldasöfnun ríkissjóðs en það er augljós forsenda fyrir raunverulegri viðspyrnu í fjármálum ríkisins. Miklu máli skiptir að styrkja áfram stöðu ríkissjóðs á næstu árum og að ríkisskuldir sem hlutfall af landsframleiðslu haldi áfram að lækka.?

Stjórnarandstöðuþingmenn fögnuðu framlagningunni, þótt þeir hefðu sitthvað efnislegt við hana að athuga. Bæði Guðmundur Steingrímsson, formaður Bjartrar framtíðar, og Steingrímur J. Sigfússon, Vinstri grænum, gerðu athugasemdir við að áætlaðar væru mjög litlar fjárfestingar. „Í mínum huga heitir það skuldasöfnun að fara ekki í nauðsynlegar fjárfestingar til að byggja upp innviði eða fara ekki í nauðsynlegt viðhald. Það safnast bara upp þörf,“ sagði Guðmundur.

Steingrímur var einnig á því að það veikti áætlunina að hvergi væri sýnt að ríkið væri að tapa. „Bæði að taka á sig kostnað sem er ófjármagnaður og tapa umtalsverðum tekjum vegna skuldaniðurfellingaraðgerðar ríkisstjórnarinnar. Það eru stórar fjárhæðir,“ sagði Steingrímur.