Strætisvagnaakstur stöðvast að óbreyttu

Svo gæti farið að strætisvagnar á Akureyri leggi niður störf í einn mánuð í sumar vegna manneklu. Ekki hefur tekist að ráða vagnstjóra í afleysingar í sumar.

„Við þurfum að ráða sex vagnstjóra í sumar í afleysingar til að halda uppi sömu þjónustu og á veturna. Það voru aðeins þrír sem sóttu um starf hjá okkur, þar af einn í aðeins hálft starf, og því stefnir í það að við þurfum að leggja niður störf í heilan mánuð í sumar. Við munum hins vegar reyna allt hvað við getum til að halda uppi eins góðri þjónustu og mögulegt er og við munum vinna í málinu áfram,“ segir Helgi Már.

Helgi Már telur ástæður þess að fáir sækja um störf vagnstjóra hjá Strætisvögnum Akureyrar vera vegna ferðaþjónustunnar. „Ferðaþjónustan vex gríðarlega og því fara afleysingabílstjórar frekar þangað þar sem hærri laun eru greidd,“ segir Helgi Már.

Matthías Rögnvaldsson, forseti bæjarstjórnar Akureyrar, segir vilja bæjaryfirvalda skýran hvað almenningssamgöngur varðar. Mikilvægt sé að vinna að því að halda uppi jafn góðri þjónustu strætó yfir sumarmánuðina eins og er yfir veturinn. „Nú hefur þeim verið falið að finna leiðir og lausnir til þess,“ segir Matthías.