Framtak Kópavogsbæjar lofsamað

Samtök iðnaðarins hafa fagnað framtaki Kópavogsbæjar, en þar var reglum breytt í þeirri von að framkvæmdir myndu aukast. Haustið 2010 var tekin upp ný aðferð við útreikninga á lóðagjöldum þegar samþykkt var ákveðið lágmarksviðmiðunarverð. Áður var gjaldið reiknað sem 70 prósent af gatnagerðargjaldi, auk lóðaverðs, og síðan borgaði fólk ákveðið gjald á hvern fermetra umfram þessi 70 prósent. Afleiðingin var sú að byggingamagn á hverri lóð var í námunda við 70 prósentin. Breytingin skilaði því að fleiri par- og fjölbýlishús voru reist.

Í upphafi þessa árs var ákveðið að setja á eitt gjald við úthlutun lóða, en áður miðaðist gjaldið við byggingarmagn á lóðinni og varð hærra því meira sem byggt var á lóðinni. Þá ákvað bæjarfélagið að endurskipuleggja hverfi þar sem lóðum hafði verið skilað inn, ekki síst vegna hrunsins, svo sem í Kórahverfinu. Ef framkvæmdir voru ekki hafnar við götur var skipulaginu breytt og lóðir minnkaðar. Guðmundur G. Gunnarsson, skrifstofustjóri umhverfissviðs hjá Kópavogsbæ, segir að þessar breytingar hafi orðið til þess að umsóknum um lóðir hafi fjölgað umtalsvert.

Jón Bjarni Gunnarsson, aðstoðarframkvæmdastjóri Samtaka iðnaðarins, segir framtakið lofsvert og vill að fleiri sveitarfélög feti í fótspor Kópavogsbæjar. „Okkur finnst þetta lofsvert framtak hjá Kópavogsbæ. Þeir slökuðu aðeins niður verðinu og það sem gerir líka mögulegt að byggja þar ódýrar íbúðir er það að ákveðnar deiliskipulagskröfur eru minnkaðar, eins og með bílastæði í bílakjöllurum.“