Aflífa þurfti hross sem ekið var á

Kveikt var í ruslatunnu sem eyðilagðist í Reykjavík í nótt en nokkur erill var hjá lögreglunni á höfuðborgarsvæðinu síðastliðin sólahring.

Bifreið var ekið á hús en fljúgandi hálka var á götunni þar sem óhappið varð.

Rétt fyrir miðnætti barst lögreglunni tilkynning um að nokkur hross væru á Vesturlandsvegi. Ekið var á eitt þeirra og þurfti að kalla út dýralækni til að aflífa hrossið en bifreiðin var dregin burt með kranabíl.

Rétt eftir kvöldmatarleytið í gær ók ölvaður ökumaður aftan á aðra bifreið í miðbænum. Lítið tjón var á bílnum og engin slys á fólki. Ökumaðurinn var talsvert ölvaður og má eiga von á ökuréttarsviptingar.

Allnokkuð var um að lögregla þyrfti að taka númer af bifreiðum sem alla jafna voru óskoðaðar eða í sumum tilvikum ótryggðar.