Óska eftir fundi um miðbæjarskipulag bæjarins

Minnihlutinn í bæjarstjórn Akureyrar hefur krafist þess að haldinn verði aukabæjarstjórnarfundur næstkomandi þriðjudag. Hafa bæjarfulltrúar minnihlutans sent forseta bæjarstjórnar bréf þess efnis. Óskað er eftir að ræða afgreiðslu skipulagsnefndar á byggingarleyfi Hafnarstrætis 106 í göngugötunni og framtíðarsýn varðandi miðbæjarskipulagið á Akureyri.

Skipulagsstjóri, Pétur Bolli Jóhannesson, gaf út byggingarleyfi til eigenda Hafnarstrætis 106, án þess að ráðfæra sig við skipulagsnefnd. Í nýju miðbæjarskipulagi er lagt til að húsið víki.

Pétur Bolli skipulagsstjóri segir í greinargerð um málið sem birtist í fundargerð síðasta fundar skipulagsnefndar að um óverulega breytingu sé að ræða.

„Ég geri fastlega ráð fyrir því að fundurinn verði haldinn næstkomandi þriðjudag,“ segir Matthías Rögnvaldsson, forseti bæjarstjórnar.