Yfir hundrað ræður um fundarstjórn

Upplausn ríkti í sölum Alþingis í gær. Við upphaf fundar kvaddi Lilja Rafney Magnúsdóttir sér hljóðs og tjáði þingheimi að Jón Gunnarsson, formaður atvinnuveganefndar, hefði sett fram breytingartillögu við rammaáætlun sem fór illa í stjórnarandstöðuna. Sökuðu þingmenn minnihlutans Jón Gunnarsson um að brjóta lög um rammaáætlun.

Á annað hundrað ræður voru fluttar í gær undir liðnum um fundarstjórn forseta þar sem stjórnarandstaðan mótmælti harðlega tillögu Jóns Gunnarssonar og velti því upp hvort hún væri yfirleitt tæk til meðferðar. Tillaga Jóns gekk út á að fjórir virkjanakostir rammaáætlunar yrðu færðir úr biðflokki í nýtingarflokk. Tillagan, sem var sett fram munnlega, varð til þess að mikil röskun varð á störfum þingsins í gær.

Píratar, minnsti þingflokkurinn, gagnrýndi einnig að mikilvæg tillaga sem þessi hefði ekki verið á dagskrá fundarins. Þingflokkurinn þyrfti að skipta með sér átta nefndum og það skipti miklu máli fyrir þingflokkinn að vita fyrirfram af svo mikilvægum tillögum.

Jón Gunnarsson vísar gagnrýni minnihlutans á bug og kallar málflutning hans ómálefnalegar dylgjur. „Um þetta mál var rætt og farið yfir á fundi forsætisnefndar sem haldinn var í hádeginu með formönnum þingflokka. Það var augljóst að ekki var verið að brjóta nein lög og ekki rökstutt með neinum hætti. Ég kalla þetta ómálefnalegar dylgjur í garð meirihluta atvinnuveganefndar um að við séum að brjóta lög.

Það var farið mjög vel yfir þetta á fundi forsætisnefndar, sem var haldinn í hádeginu með formönnum þingflokka. Það var augljóst að ekki var verið að brjóta nein lög og ekki rökstutt með neinum hætti og kalla ég þetta ómálefnalegar dylgjur í garð meirihlutans að við séum að brjóta lög.“

„Þessi málsmeðferð er fullkomlega fáránleg,“ segir Guðmundur Steingrímsson, formaður Bjartrar framtíðar. „Í landinu gilda lög um vernd og nýtingu landsvæða og það er óskiljanlegt af hverju meirihlutinn vill ekki fara að lögum. Ef þeir vilja virkja meira og breyta rammaáætlun þá eru sérstök ákvæði um það hvernig hægt er að gera það með faglegu umsagnarferli og umræðum á Alþingi,“ segir Guðmundur.