Lokuðu á gufustrók úr borholu

Borholu á vinnusvæði Landsvirkjunar við Þeistareyki hefur verið lokað, en hún gaus óvænt háum gufustrók þann 18. desember síðastliðinn.

Um er að ræða niðurrennslisholu sem lokið var við að bora í október og hugsuð er fyrir losun á jarðhitavökva frá fyrirhugaðri jarðvarmavirkjun á Þeistareykjum.

Ástæða gufustróksins var að eftir borun hitnaði vatn sem stóð í holunni. Á ákveðnum tímapunkti virðist vatnið hafa náð suðupunkti og þrýstist þar með upp úr holunni og myndaði vatns- og gufustrók sem stóð tugi metra upp í loftið, segir á heimasíðu Landsvirkjunar.

Reynt var að kæla holuna aftur með því að dæla köldu vatni í nærliggjandi holu en hálfs mánaðar dæling hafði engin áhrif. Í síðustu viku var því ákveðið að setja loka á holuna. Helstu sérfræðingar fyrirtækisins í gufuveiturekstri nýttu kranabíl úr Kröflu til starfans og tókst með góðri samvinnu að loka holunni og er nú gufustrókurinn úr sögunni.