Svepprótarbirki gegn lúpínu

umhverfismál„Við ætlum okkur stóra hluti á þessu sviði,“ segir Jón Jóel Einarsson hjá fyrirtækinu Rootopia sem er að þróa nýja aðferð við gróðursetningu plantna í krefjandi aðstæðum. Aðferðin byggir á að láta sveppi fylgja rótum plantnanna.

Framkvæmdanefnd Norðurþings hefur samþykkt erindi Rootopia um þátttöku sveitarfélagsins í tilraunaverkefni þar sem beita á um 450 birkiplöntum gegn lúpínu á nokkrum stöðum. Plönturnar sem eru um 100 sentímetra háar verða „smitaðar svepprót“ til að bæta fyrir skort á örverum sem er í skóglausu landi. Sækja á um styrk til verkefnisins í Minningarsjóð Hjálmars R. Bárðarsonar og Else S. Bárðarson.

Að sögn Jóns hefur ýmsum meðulum verið beitt til að hefta lúpínu, hún sé slegin með orfi, eitrað sé fyrir henni og heitu vatni beitt á hana auk þess sem hún sé plægð upp með stórvirkum vélum.

„En þetta er ekki endilega slagur við lúpíuna heldur er ætlunin að láta þetta vinna saman og láta náttúruna sjá um sig sjálfa. Svo vex birkið upp úr og lúpínan hopar þá í kjölfarið og annar gróður kemur inn,“ útskýrir Jón og bendir á að sömu aðferð megi nota gegn hinum ágenga skógarkerfli.

Jón segir Rootopia, sem þar til nýlega hét Grænn gróði, hafa staðið fyrir frameldi á skógarplöntum.

„Við höfum verið að vinna mjög smátt í þessu í nokkur ár en ætlum okkur að stækka og erum á þeim buxunum núna,“ segir Jón en Rootopia hefur staðið fyrir frameldi á skógarplöntum. „Það sem er kannski áhugaverðast við aðferð okkar er að þessu er plantað út og það þarf ekkert að hugsa um það meira, það er enginn áburður – bara vinnan við að koma þessu niður. Svo er plantan sjálfbær þar á eftir,“ segir Jón.

Að sögn Jóns hyggur Rootopia á alþjóðlegt samstarf.

„Við erum alveg sannfærðir um að við höfum eitthvað til málanna að leggja,“ segir Jón sem kveður áðurgreinda aðferð geta nýst á öðrum jaðarsvæðum gróðurfarslega séð. Til dæmis í eyðimörkum Afríku og Kína. „Við sjáum fyrir okkur samstarf á milli þessara svæða.“