Rummungar sækja í eldri Subaru-bifreiðar

Gamlir Subaru-bílar hafa upp á síðkastið notið vinsælda hjá bílaþjófum. Síðast var stolið sextán ára gömlum grænum Subaru Legacy-bíl í Laugarneshverfi í Reykjavík aðfaranótt fimmtudags.

Jóhann Karl Þórisson, aðstoðaryfirlögregluþjónn hjá lögreglunni á höfuðborgarsvæðinu, segir ekki laust við að svo virðist sem þjófar eigi eitthvað auðveldara með að komast inn í þessa bíla en aðra.

„Það fór einn í nótt og svo hafa verið teknir einhverjir fjórir eða fimm á síðustu mánuðum sem ég man eftir,“ segir hann. Oftast finnist þessir bílar fljótlega, þótt brenna vilji við að þeir hafi eitthvað skemmst, eða umgengni um þá verið slæm.

Sunna Dís Másdóttir, eigandi bílsins sem síðast hvarf, segir þjófnaðinn hafa uppgötvast í síðustu viku þegar eiginmaðurinn ætlaði út í búð. Bíllinn fannst síðar sama daginn og bar þess merki að hafa lent í árekstri.

„Ég spyr mig hverju fólk er á höttunum eftir,“ segir Sunna og bætir við að ekki hafi verið fyrir verðmætunum að fara í bílnum. „Ég veit ekki hversu eftirsóknarverður svona skrjóður er, en mér þykir voða vænt um hann.“

Guðjón Helgi Ólafsson, sérfræðingur í bíliðnum og stoltur Subaru-eigandi sjálfur, segir þekkt að slitnir lyklar geti stundum gengið að slitnum lásum og svissum bílanna. Á árum áður var þekkt að með þessum hætti mátti stundum komast inn í og jafnvel ræsa gamlar Saab- og Volvo-bifreiðar.

Ráð við þessu segir Guðjón geta verið að leita til aðila á borð við Neyðarþjónustuna og láta skera út nýjan lykil.

„Þegar maður er búinn að nota nýjan lykil í smástund er erfiðara að nota slitinn lykil,“ segir hann. „En það er svo sem eins víst að þessir andskotar brjóti þá bara rúðuna,“ bætir hann við.

Önnur leið gæti því verið að fjárfesta í þjófavörn sem sett er í eftir á. Þar sé þó kostnaður farinn að skipta máli, því ekki kosti gamlir Subaru-bílar mikið.

„En, kannski betra að eiga sinn gamla Subaru en að vanta hann?“

Samkvæmt upplýsingum frá Nesradíói sem sérhæfir sig í slíkum ísetningum kostar slíkt kerfi 50 til 60 þúsund krónur þegar það er komið í.

En svo eru líka til ódýrari leiðir. „Ég hef einmitt heyrt af einni sem átti Subaru sem alltaf var verið að taka,“ segir Sunna Dís. „Hún er farin að læsa stýrinu með keðjulás við sætið.“

Listaverk og gamlar ferðatöskur horfnar

Subaru Legacy-bíl listakonunnar Rúnu K. Tetzschner, var stolið í miðbæ Reykjavíkur aðfaranótt gamlársdags. Bíllinn fannst í Seljahverfi í Breiðholti 2. janúar, en 46 listaverk sem í honum voru eru ófundin enn. Verkin voru í skotti bílsins í tveimur gömlum ferðatöskum, sem einnig hafa tilfinningalegt gildi fyrir Rúnu.

„Ég er sjálf, listamaðurinn, bláfátæk en tjónið er líka óbætanlegt fyrir mig þar sem um eigin sköpunarverk er að ræða. Ég held enn í vonina um að myndirnar finnist,“ segir hún. Aðra töskuna erfði hún frá afa sínum, en hann hafði haft í henni aleiguna þegar hann flutti ungur maður frá Jótlandi til Sjálands.

„Hina erfði ég frá manninum mínum heitnum, Þorgeiri Rúnari Kjartanssyni, tónlistarmanni og rithöfundi, sem geymdi í henni ljóð sín og skrif. Sjálf hef ég geymt myndirnar mínar í töskunum og þær hafa fylgt mér á ferðalögum síðustu 16 árin.“ Rúna segir að viti einhver um eigur hennar megi hafa við hana samband í síma 691-3214 eða ræða við lögreglu.