Mánaðarskammtur af rislyfjum á 40 þúsund

Hannes Ívarsson, sem fékk krabbamein í blöðruhálskirtil fyrir rúmum tveimur árum, hefur glímt við risvandamál í kjölfar aðgerðar vegna krabbameinsins. Hann hefur hins vegar ekki efni á sérstökum stinningarlyfjum sem gætu gagnast honum. „Mánaðarskammtur af lyfjunum kostar um 20 til 40 þúsund krónur. Læknar benda á ódýrari samheitalyf en þau virka ekki,“ segir Hannes sem skrifar um þessi mál í aðsendri grein í Fréttablaðinu í dag.

Hann kveðst hafa þurft að greiða að fullu fyrir sérstaka pumpu sem ráðlagt er að nota til að auka blóðstreymi að getnaðarlimnum. „Hún kostar um 40 þúsund krónur. Ég sótti um niðurgreiðslu á þessum búnaði og einnig lyfjum en fékk synjun. Konur sem veikjast af brjóstakrabbameini fá nauðsynleg hormónalyf niðurgreidd. Þær bera bara hluta kostnaðar við búnað sem þeim er nauðsynlegur eftir brjóstnám. Þarna virðist vera um mismunun að ræða.“

Að sögn Hannesar ræða karlar þessi vandamál í sínum hópi, til dæmis í Ljósinu, en ekki sé algengt að þeir ræði þau opinberlega þar sem risvandamál séu alltaf feimnismál hjá körlum.

Gunnjóna Una Guðmundsdóttir, félagsráðgjafi hjá Krabbameinsfélagi Íslands, segir karla almennt ekki ræða um risvandamál í viðtölum þar. Þeir ræði hins vegar um mikinn kostnað vegna læknisþjónustunnar. „Mér finnst afar óréttlátt að karlar þurfi að greiða að fullu fyrir lyf og tæki sem gagnast þeim. Þetta skiptir miklu máli fyrir vellíðan þeirra.“

Kristján Þór Júlíusson heilbrigðisráðherra segir Lyfjagreiðslunefnd ákvarða niðurgreiðslu á stinningarlyfjum. Ráðherra geti ekki hlutast til um það. „Synji lyfjagreiðslunefnd umsókn um greiðsluþátttöku hefur umsækjandi heimild til að bera þá ákvörðun undir dómstóla samkvæmt almennum reglum. Ákvarðanir nefndarinnar sæta hins vegar ekki endurskoðun ráðherra.“

Heilbrigðisráðherra segir greiðsluþátttöku hjálpartækja í sífelldri skoðun. „Það er hins vegar rétt að benda á að sá liður Sjúkratrygginga var rekinn í halla á síðasta ári og svigrúmið þar því lítið. Það er þó alltaf til athugunar hvort unnt sé að bæta við fleiri flokkum hjálpartækja sem hljóti niðurgreiðslu.“