Svarar stjórn Orkuveitunnar engu um gesti forstjórabústaðar

Enn fæst ekki upplýst um alla þá sem nýttu sér svokallaðan forstjórabústað Orkuveitu Reykjavíkur í Riðvík við Þingvallavatn í trássi við ákvörðun stjórnar fyrirtækisins.

„Ekki hafa verið teknar saman upplýsingar um það hvaða einstaklingar hafa notað bústaðinn á hverjum tíma, en aðeins framkvæmdastjórar og forstjóri höfðu aðgang að honum,“ segir í svari Bjarna Bjarnasonar, forstjóra OR, við fyrirspurn fulltrúa Sjálfstæðisflokksins í stjórn fyrirtækisins.

Svar Bjarna bætir engu við það sem fram hafði komið í sumarbústaðarmálinu frá því Fréttablaðið greindi fyrst frá því 5. september síðastliðinn og þar til fyrirspurnin var sett fram á stjórnarfundi 27. október síðastliðinn. Það eina sem fram hafði komið var að Bjarni hefði notað bústaðinn sjálfur, þar af tvisvar sumarið 2012.

„Fulltrúar Sjálfstæðisflokksins óska eftir nánari upplýsingum um hverjir hafa haft afnot af sumarbústöðum Orkuveitunnar við Þingvallavatn í Riðvík síðastliðin fjögur ár,“ sagði í fyrirspurninni.

Þrátt fyrir að fjórar vikur hafi liðið þar til svar forstjórans var lagt fram virðist ekki hafa verið reynt að hafa fyrir því að afla þeirra upplýsinga sem forstjórinn segir að hafi ekki „verið teknar saman“.

Í upphaflegri frétt Fréttablaðsins frá 5. september síðastliðinn kom fram í máli upplýsingafulltrúa OR að forstjórabústaðurinn hefði lítið verið notaður síðasta áratug sökum ástands hans. Framtíð hússins væri ófrágengin en líklegast myndi það standa áfram á sama stað.

Fimm dögum síðar sagði Bjarni forstjóri að bústaðurinn yrði rifinn enda stæði hann á vatnstökusvæði. Hann staðfesti að stjórn fyrirtækisins hefði ákveðið á árinu 2010 að afnema einkaafnot eða forgang að húseignum. Þrátt fyrir það notuðu útvaldir bústaðinn áfram allt fram á síðasta sumar. „Skortur á reglum um notkun hans og ákvörðun um framtíð hans skrifast á mína ábyrgð,“ sagði forstjórinn.

Við skoðun Fréttablaðsins á húsinu virtist það í góðu standi enda fékkst síðar upplýst að lagðar hefðu verið níu milljónir króna í endurbætur á því frá árinu 2008.

Áslaug Friðriksdóttir, annar fulltrúa Sjálfstæðisflokksins í stjórn OR, segir þá ekki munu hreyfa frekar við málinu. „Við höfum ekki ýtt frekar á eftir því að farið verði í sérstaka úttekt á notkuninni þar sem framtíð bústaðarins er ráðin í sjálfu sér. En við munum þó að sjálfsögðu fylgjast með framkvæmdinni.“