Biðja um undanþágu frá vinnsluskyldu byggðakvóta

Hreppsnefnd Vopnafjarðarhrepps hefur óskað eftir undanþágu frá vinnsluskyldu á byggðakvóta á yfirstandandi fiskveiðiári. Vopnafjarðarhreppur fékk úthlutuð um 550 tonn af byggðakvóta á þessu ári og vill fá að landa því annað.

Árlega ráðstafar ráðherra ákveðnum aflaheimildum til stuðnings byggðarlögum sem hafa lent í vanda vegna samdráttar í sjávarútvegi og eru háð veiðum eða vinnslu á botnfiski.

Ólafur Áki Ragnarsson, sveitarstjóri Vopnafjarðarhrepps, segir þetta vera neyðarúrræði. „Það hefur ekki verið sýnt fram á það með haldbærum rökum að fyrir hendi sé vinnsla á Vopnafirði sem ráði við vinnslu á byggðakvóta Vopnafjarðar,“ segir Ólafur. Hann bendir á að þrjú hundruð tonnum af byggðakvóta hafi verið úthlutað til Vopnafjarðar og einnig eigi þeir um 250 tonn frá fyrra ári. „Það skiptir miklu máli að ná að landa eins miklum afla og hægt er af aflaheimildum fyrra árs því annars missum við þann hluta frá okkur í næstu úthlutun.“

Atvinnuvega- og nýsköpunarráðuneytið hefur ekki tekið undanþágubeiðni hreppsins til efnislegrar meðferðar en að sögn Þóris Hrafnssonar, upplýsingafulltrúa ráðuneytisins, er von á niðurstöðu frá ráðuneytinu innan tveggja vikna. 29 sveitarfélög landsins fengu úthlutaðan byggðakvóta á þessu fiskveiðiári og er Vopnafjarðarhreppur eina sveitarfélagið sem óskar eftir undanþágu frá reglum um vinnslu í heimabyggð.

Ólafur Áki vonar að hægt verði að vinna kvóta á Vopnafirði í náinni framtíð. „Við höfum verið í viðræðum við fjölda aðila um að koma að verkefninu með okkur og vinna aflann. Margir hafa verið áhugasamir um að hefja vinnslu á staðnum og vilja skoða það fyrir næsta fiskveiðiár. Hér er um að ræða kjörið tækifæri til að fjölga störfum í heimabyggð og auka fjölbreytni í atvinnutækifærum fyrir íbúa,“ segir Ólafur Áki.

Í umsögn atvinnu- og ferðamálanefndar Vopnafjarðarhrepps kemur fram að nefndin telji mikilvægt að vinnslu á bolfiski verði komið í þann farveg að ekki þurfi að koma til þess á fiskveiðiárinu að fiskur sé fluttur frá staðnum óunninn. Það eru því eindregin tilmæli atvinnu- og ferðamálanefndar að hlutaðeigandi aðilar komi af stað fiskverkun sem getur tekið á móti bolfiski til vinnslu á Vopnafirði til næstu framtíðar.