Fárviðri gengur yfir landið: Taka í spil, horfa á drekamyndir og Kristján Má á hamfaravaktinni

Ólöf Skaftadóttir skrifar 7. desember 2015 17:00

Nú þegar einu mesta fárviðri í áratugi er spáð á landinu, tók blaðamaður nokkra þekkta einstaklinga tali og forvitnaðist um hvað þeir hyggðust taka sér fyrir hendur í kvöld.

Svörin voru að vonum ólík, sumir höfðu þegar skipulagt kvöldið í samveru með fjölskyldu, eða vinnu - en aðrir vissu ekki einu sinni af veðurspánni.

Ari Matthíasson, leikhússtjóri og Sigmar Guðmundsson, fjölmiðlamaður.

Sigmar Guðmundsson, fjölmiðlamaður segist að minnsta kosti ekki ætla að horfa á gagnvirkt spákort af storminum sem allir vefmiðlar sýni.

„Það er ámóta spennandi og kassinn án Almars. Ætli aukafréttatími Stöðvar 2 rúlli ekki bara í lúppu því mér skilst að Kristján Már sé á hamfaravaktinni. Svo horfi ég á einhverja drekamynd með henni Júlíönu minni, því hún hefur svo mikin áhuga á þeim fræðum."

Aðrir höfðu ekki jafn nákvæmar lýsingar á kvöldinu á reiðum höndum. Þegar blaðamaður spurði Ara Matthíasson, Þjóðleikhússtjóra Íslendinga, hvað hann hyggðist gera í vonda veðrinu svaraði hann:

„Hvaða stormur?"

Þórunn Antonía Magnúsdóttir, söngkona ætlar að hafa það náðugt með fjölskyldu sinni.

„Ég ætla að lifa mig inní þetta ævintýri til botns, lesa bækur fyrir dóttur mína og horfa á einhverja æsispennandi þætti undir teppi og kveikja á kertum. Jafnvel gera eitthvað jóla eins og að hugsa um að baka. Samt ekki gera það."

Guðmundur Jörundsson ætlar að sinna vinnufíkn sinni meðan fárviðrið gengur yfir.

„Ég ætla að læsa mig ofaní stúdíói JÖR og undirbúa jólatörnina. Erum að koma síðustu jólasendingunum í hús. Ég hugsa að ég endi kvöldið, ef ég kemst heim, á því að horfa á einhverja góð óveðursmynd."

Guðmundur Jörundsson fatahönnuður og Áslaug Arna, ritari Sjálfstæðisflokksins

Áslaug Arna Sigurbjörnsson, ritari Sjálfstæðisflokksins er í prófatörn.

„Ég var að koma úr prófi i lagadeildinni og ætlaði að taka því rólega í dag áður en ég byrja að læra undir næsta próf á morgun. Sit núna að spila Olsen-olsen með systur minni og ætla svo heim og nýta tímann í smá jólatiltekt og smákökubakstur. Það mun kannski ekki gefast mikill tími í slíkt þegar eg loksins kemst í jólafrí frá skólanum þann 16.des."

Erpur Eyvindarsson, rappari, og Elísabet Jökulsdóttir, höfundur.

Rapparinn Erpur Eyvindarsson ætlar að nýta tímann í ekki neitt.

„Ég ætla ekki að gera sjitt. Horfa á eitthvað. Kannski lesa eina bók."

Elísabet Kristín Jökulsdóttir, höfundur, hefur hinsvegar þegar hafið undirbúning.

„Ég er að sjóða kjötsúpu sem verður tilbúin áður en rafmagnið fer 17.45 og bíða eftir að sagan mín klárast, ég hef hótað henni að ég muni hætta að skrifa ef hún fer ekki að koma, það bíða allir, prentsmiðjan, hönnuðurinn, aðdáendur, lesendur, og það er allt stopp, ég held þetta sé gamall stormur sem gleymdist að segja frá í sálfræðitíma og nú muni þessi stormur fara í gegn enda hef ég allt opið," segir Elísabet og heldur áfram.

„En ég ætla semsagt að vera hérna með kjötsúpunni og tveimur huskyhundum. Bý mót opnu hafi þannig að héðan gæti verið bein útsending. Almar?"