Vill að fólk hætti að styrkja ÍR: „Í stað þess hagar ÍR sér eins og Árni Johnsen“

Jónas Kristjánsson, ritstjóri, hvetur fólk til þess að hætta að styrkja íþróttafélagið ÍR en frá þessu greinir  hann á bloggsíðu sinni.

Jónas er ekki sáttur við félagið en Reykjavíkurborg hefur kært ÍR fyrir að höggva af yfir 100 birkitrjám við Breiðholtsbraut. Trén voru farin að skyggja á auglýsingaskilti á svæði ÍR-inga

„Mér sýnist, að birkið, sem Íþróttafélag Reykjavíkur sagaði við Breiðholtsbraut, hafi verið utan lóðar félagsins. Jafnvel sé gróðaskilti félagsins einnig utan lóðar félagsins. Vandséð er, að borgin komist hjá að fylgja fast eftir málinu gegn félaginu og ruddastjórn þess,“ segir Jónas.

Hann bætir við að ólíðandi sé að menn komist upp með ofbeldi af þessu tagi.

„Birki af gerðinni Emblu lifir ekki sögun. Vegamálastjóri neitar ábyrgð, segist hafa bent á að leita þyrfti leyfis borgaryfirvalda. Í stað þess hagar ÍR sér eins og Árni Johnsen, „égummigfrámértilmín“. Borgin á auðvitað að fella niður styrki til gróðafíkla, sem haga sér svo. ÍR er víti til að varast.“

Á síðu Vegagerðarinnar segir að þann 22. september hafi borist tilkynning frá ÍR um að flettiskilti í eigu ÍR væri komið í hvarf á bak við trjágreinar. Þá tilkynntu ÍR-ingar að félagið hefði í hyggju að klippa greinarnar ofan af trjám niður og lækka þannig trjágróðurinn að hann skyggði ekki á flettiskiltið. Undir lok tilkynningarinnar frá ÍR stóð síðan; „Berist ekki formleg andmæli frá Vegagerðinni innan 15 daga frá dagsetningu þessa bréfs lítur ÍR svo á að þessi aðgerð verði látin afskiptalaus.“

Vegagerðin svaraði þann 30. september svohljóðandi: „Vegagerðin gerir ekki athugasemdir við þetta en trjágróður meðfram þjóðvegum er almennt ekki á hennar vegum. Í þessu tilviki er það Reykjavíkurborg.“

Vegagerðin vísaði því málinu til Reykjavíkurborgar sem veitti ekki leyfi fyrir því að trén yrðu lækkuð.