Slökkt á kerskálanum ef það kemur til verkfalls

Stjórnendur álversins í Straumsvík segja að slökkva verði á kerskála í verksmiðjunni ef kemur til verkfalls starfsmanna eftir rúman mánuð en yfirvinnubann hefst þar á föstudag. Ef slökkt verði á kerskálanum jafngildi það að fyrirtækinu verði lokað.

Stjórnendur álversins hafa afþakkað öll viðtöl vegna kjaradeilnanna en svara staðhæfingum Gylfa Ingvarssonar ráðgjafa starfsmanna sem sagði þá stunda hræðsluáróður og hóta lokun álversins gangi þeir ekki að forgangskröfu um aukna heimild til verktöku.

Í svari þeirra segir að mjög dýrt sé að endurræsa kersskála eftir að slökkt hefur verið á þeim og erlendis séu dæmi um skála sem hefur verið slökkt á árum saman. Því láti það nærri af ef ekki er kveikt á kerskálunum þurfi að loka fyrirtækinu. 

Sé kerskálanum lokað sé það ennfremur hreinlega undir móðurfélaginu komið, hvenær og hvort verður kveikt á honum aftur.

Gylfi segir starfsmenn í kjarabaráttu, ekki í baráttu til þess að loka fyrirtækinu. „Það er mjög alvarlegt að reka mál á þessum nótum. Við erum í kjarabaráttu til að bæta kjör okkar, ekki til að loka fyrirtæki. Enginn góður bóndi slátrar mjólkurkúnni sinni, við erum ekki í þeirri vegferð. Við erum í þeirri vegfærð að bæta kjör starfsmanna.“



Sjónarmið álversins eru að ekkert fyrirtæki á Íslandi þurfi að búa við jafn miklar takmarkanir á verktöku og ISAL en heimildin sem fyrirtækið fer fram á gerir það að verkum að hátt í 80 launamenn gætu orðið verktakar.

Ísal er bundið til þess að kaupa tiltekið magn af raforku af Landsvirkjun til ákveðins tíma en stjórnendur vilja ekki svara því til hversu hratt fyrirtækið gæti hætt starfsemi sinni í Straumsvík. Ákvæði samningsins séu trúnaðarmál.