Fjörutíu prósent hrefna veidd innan gamla griðarsvæðisins

Fjörutíu prósent þeirra hrefna sem veiddust árin 2013 og 2014 voru innan þess svæðis sem Sigurður Ingi Jóhannsson sjávarútvegsráðherra breytti úr griðarsvæði í nýtingarsvæði árið 2013. Breytingin var í samræmi við tillögu Hafrannsóknarstofnunar frá árinu 2009 en fyrirrennari Sigurðar stækkaði svæðið.



24 dýr innan gamla svæðisins

Upplýsingar um nákvæmar staðsetningar þeirra dýra sem veidd voru síðastliðin tvö ár voru birt í svari Sigurðar Inga við fyrirspurn Katrínar Jakobsdóttur, formanns Vinstri grænna, á Alþingi í gær. Vísir hefur teiknað staðsetningarnar inn á kort auk tveggja reglugerða um bann við hvalveiðum á tilteknum svæðum.

Sjá einnig: Ekkert eftirlit haft með brottkasti á hrefnu



Þegar gögnin eru borin saman kemur í ljós að 24 af 59 veiddum hrefnum voru veiddar á svæði sem gamla reglugerðin, sem felld var úr gildi með þeirri nýju, lagði bann við veiðum. Ein hrefna var síðan veidd innan griðarsvæðisins eins og það lítur út í dag og var því veidd ólöglega. Upplýsingar um eina hrefnu eru ófullnægjandi.



Kort af svæðunum og staðsetningum veiddra hrefna má sjá neðst í fréttinni.



Miklar breytingar gerðar

Svæðið eins og það er í dag er í samræmi við tillögur Hafrannsóknarstofnunar sem gerðar voru árið 2009. Mörkin sem þar voru dregin voru í gildi allt frá 2009 til 21. maí 2013 þegar Steingrímur J. Sigfússon, þáverandi sjávarútvegsráðherra, gaf út nýja reglugerð sem stækkaði svæðið verulega.



Þau mörk giltu þó ekki nema í nokkrar vikur því 5. júlí sama ár gaf Sigurður Ingi, þá nýr ráðherra, út reglugerð sem færði mörkin til þess sem áður var. Í tilkynningu frá honum vegna breytinganna kom fram að meðal raka fyrir þeim væri hversu margar hrefnur hefðu áður veiðst á svæðinu.



Afar umdeildar ákvarðanir

Ákvarðanir beggja ráðherra um hvalaskoðunarsvæðin, eða griðarsvæði hvala, hafa verið afar umdeildar. Hvalveiðimenn mótmæltu harðlega ákvörðunar um sérstakt hvalaskoðunarsvæði þegar það var fyrst skilgreint árið 2009 og svo aftur þegar Steingrímur ákvað að stækka svæðið til muna á síðustu dögum sínum í embætti.



Andstæðingar hvalaveiða mótmæltu hins vegar þegar Sigurður Ingi ákvað að færa mörkin aftur til baka auk ferðaþjónustufyrirtækja.