Himinn og haf er á milli deilenda

KjaramálBiðstaða er í launadeilu starfsmanna við Norðurál. Vilhjálmur Birgisson, formaður Verkalýðsfélags Akraness, segir deilunni mjög fljótt hafa verið vísað til Ríkissáttasemjara.

Næsti sáttafundur er boðaður níunda þessa mánaðar. „Það er alveg ljóst að enn er himinn og haf á milli deiluaðila,“ segir hann.

Á vef verkalýðsfélagsins hefur verið greint frá því að Norðurál hafi hafnað nær öllum kröfum starfsmanna, en boðið 2,5 prósenta launahækkun, auk 75 þúsund króna eingreiðslu og tengingu við hækkanir sem um kann að semjast á almennum vinnumarkaði.

Kröfur starfsmanna hljóða hins vegar meðal annars upp á 20,9 prósenta hækkun byrjunarlauna, úr 206 þúsund krónum í 249 þúsund og að tekið verði upp vaktakerfi sem byggist á þrískiptum átta tíma vöktum, á sömu launum og starfsmenn fá nú greidd fyrir 12 tíma vaktir.

„Það er ekki mikil hreyfing á þessu en við erum alltaf vongóðir á meðan menn tala enn þá saman,“ segir Vilhjálmur. Einhugur sé um baráttumálin meðal starfsmanna.

„Grundvallaratriði er að fyrirtæki í þessum geira hafa hagnast mjög vel og Norðurál, eitt glæsilegasta fyrirtæki á Íslandi, hefur hagnast nær öll ár frá byrjun. Og í því viljum við fá hlutdeild, því að allir græða ef þeir sem starfa í þessum fyrirtækjum fá góð laun. Sveitarfélögin fá hærri útsvarstekjur, ríkið meiri skatttekjur og verslun og þjónusta blómstrar á þeim svæðum sem slíkar verksmiðjur starfa,“ segir Vilhjálmur.

Því skipti miklu máli að ná sem mestu út úr þessum fyrirtækjum. „Og það er hlutverk okkar í verkalýðsfélögunum að gera það.“



Hvað varðar aðgerðir til að þrýsta á um lausn deilunnar segir Vilhjálmur eðli starfseminnar hjá Norðuráli setja vinnustöðvunum ákveðin takmörk. Ál er brætt í kerum sem þola ekki að vera stöðvuð í lengri tíma en fáeinar klukkustundir því þá storknar í þeim málmurinn og þarf að endurnýja kerin með ærnum tilkostnaði.

Hinn 1. apríl geti starfsmenn hins vegar kosið um aðgerðir. „Og að sjálfsögðu munum við beita hverjum þeim tækjum og tólum sem við höfum til að ná fram sanngjarnri leiðréttingu á launum þeirra sem þarna starfa.“

Ragnar Guðmundsson, forstjóri Norðuráls, sem fer fyrir samninganefnd fyrirtækisins segir best fara á því að halda samningaviðræðum við samningaborðið, en ekki í fjölmiðlum. Málið sé í eðlilegum farvegi hjá Ríkissáttasemjara.