Sonur Sir Alex aftur kominn með stjórastarf

Darren Ferguson, sonur Sir Alex Ferguson, er ekki lengur atvinnulaus en C-deildarliðið Doncaster Rovers hefur ráðið hann sem nýjan knattspyrnustjóra félagsins.

Hinn 43 ára gamli Ferguson hefur verið án starfs síðan að hann hætti hjá Peterborough í febrúar eftir fjögurra ára starf.

Darren Ferguson var þar að enda sína aðra lotu með Peterborough en hann gerði góða hluti með Peterborough á árunum 2007 til 2009 þegar liðið fór upp um tvær deildir og alla leið í B-deildina.

Það er ekki auðvelt að fylgja í fótspor sigursælasta stjóra alla tíma en Darren Ferguson á enn eftir að fá tækifærið í efstu deild.  

Ferguson tekur við stöðu landa síns Paul Dickov sem var rekinn 8. september eftir að liðið náði aðeins í sex stig í fyrstu sex leikjum sínum. Rob Jones tók tímabundið við liðinu og liðið vann aðeins einn af sex leikjum undir hans stjórn. Það er aðeins markatala sem heldur liðinu frá fallsæti eins og staðan er í dag.

„Við erum með góðan hóp leikmanna og markmiðið er að komast upp í B-deildina. Óvissunni er lokið og nú getum við byrjað upp á nýtt. Ég er mjög ánægður með að vera kominn hingað. Sýn mín og eigandana passar vel saman og það var því enginn vafi í mínum huga,“ sagði Darren Ferguson við BBC.

Darren Ferguson var fótboltamaður á sínum tíma og lék meðal annars 27 leiki undir stjórn pabba síns hjá Manchester United á árunum 1990 til 1994. Hann var síðan í fimm ár hjá Wolverhampton Wanderers og átta ár hjá Wrexham.

Ferguson tók fyrst við Peterborough United árið 2007 og stýrði því til 2009. Hann var síðan í minna en eitt ár með Preston North End áður en hann snéri aftur til Peterborough árið 2011. Ferguson var síðan með Peterborough-liðið frá 12. janúar 2011 til 21. febrúar 2015.

Darren Ferguson verður 44 ára gamall í febrúar næstkomandi en þegar faðir hans Sir Alex Ferguson var á sama aldri var hann einu ári frá því að taka við liði Manchester United. Ferguson vann síðan 38 titla með Manchester United frá 1986 til 2013.