Táningur slapp ótrúlega vel frá bílslysi í Vesturbænum

Betur fór en á horfðist þegar táningurinn Jón Eldar varð fyrir sendiferðabíl á Hringbraut í Reykjavík í byrjun ársins. Jón slapp með stóra kúlu, glóðarauga og eymsli í annarri öxlinni. Móðir hans, Sara Jónsdóttir, segir að mikilvægt sé að halda áfram að segja börnum að passa sig í umferðinni eftir að þau komast á unglingsaldurinn.

„Hann var að koma úr strætó, gekk yfir Hringbrautina á leiðinni heim, klukkan átta um kvöld. Hann sá  kyrrstæðan bíl á beygjuljósum og heldur þá að hann geti tekið sénsinn og labbað yfir Hringbrautina. Hann heldur að það sé ennþá rautt á beinu ljósunum en það reynist síðan ekki vera,“ segir Sara um aðdraganda slyssins.

Þegar út á götuna var komið áttar Jón sig á því að það sé grænt ljós á akreininni sem hann er að fara yfir. „Hann sér sendiferðabíl nálgast og reynir að spretta af stað en nær því ekki. Hann verður þá fyrir sendiferðabílnum,“ segir móðir hans. Hún lýsir því að Jón hafi tekist á loft og endað á umferðareyju á Hofsvallagötu.

Fljótlega eftir slysið voru sjúkrabílar og lögregla komin á vettvang. Jón gat sagt konu sem varð vitni að slysinu hvar hann ætti heima og hljóp hún heim til hans til að gera Söru viðvart. „Við náum að hlaupa út á gatnamót. Þá eru tveir lögreglubílar og einn sjúkrabíll en sjúkrabíllinn með honum var farinn. Við vissum ekki ástandið á honum,“ segir hún.

Leið hennar lá þá beint niður á bráðamóttöku þar sem sonur hennar hafði verið fluttur.

„Þegar við komum upp á bráðadeild, búin að keyra í miklu sjokki uppeftir, þá liggur hann á sjúkrabörum með kraga. Þá átti eftir að kanna allan líkama hans en hann var í svo miklu sjokki að hann titraði allur. Síðan kom á næstu mínútum í ljós að hann gat hreyft sig og hálsliðir voru í lagi,“ segir Sara.

Sem betur fer slapp Jón með minniháttar áverka. „Hann fór bara mjög stuttu seinna aftur í skólann og það sér ekki á honum í dag. Þetta er var bara ótrúlegt og eins og þau upp á bráðadeild sögðu þá var þetta bara með ólíkindum,“ segir Sara aðspurð um líðan hans í dag.

Hún segir að slysið hafi verið áminning á að muna að vara börn við hættunum sem leynast í umferðinni, jafnvel þó þau séu komin á unglingsaldurinn. „Þegar börnin manns eru orðin stór, orðnir unglingar, þá er maður löngu hættur að segja þeim að passa sig á bílunum en það er akkúrat þá sem þau fara að taka sénsana,“ segir hún.