Facebook-samtal Skeljagrandabróður við konuna verður notað sem sönnunargagn

Lögreglustjórinn á höfuðborgarsvæðinu má leggja fram Facebook-samskipti Kristjáns Markúsar Sívarssonar sem sönnunargagn við réttarhöld yfir Kristjáni. Verjandi Kristjáns hafði kærði úrskurð Héraðsdóms Reykjaness til Hæstaréttar í annað skipti.

Kröfu Kristjáns um að ákæruvaldinu yrði synjað um framlagningu þessara rannsóknargagna var hafnað í tvígang í héraði og í Hæstarétti í janúar þar sem kæran þótti ekki fullnægja skilyrðum lagaákvæðis og því var henni vísað frá. Hæstiréttur vísaði frá áfrýjun lögmanns Kristjáns í kjölfar síðari höfnunar í héraði.

Facebook-samskiptin sem á að leggja fram sem sönnunargagn eru á milli hans og konu sem hann er sakaður um að hafa veist að á bílastæði, slegið hana ítrekað hnefahögg í andlit, höfuð og á hendur og úlnlið. Lögreglan komst yfir þau við handtöku Kristjáns þann 27. nóvember í fyrra. Auk þess er Kristján ákærður fyrir brot gegn ákvæðum vopnalaga og umferðarlaga.

Óskýr ákæra til Hæstaréttar

Í úrskurði Héraðsdóms Reykjaness kemur fram að við handtöku ákærða og húsleit mátti sjá borðtölvu sem hafði verið tengd við sjónvarp með opinni Facebook vefsíðu þar sem notandanafn Kristjáns kom fram. Húsráðandi sagðist eiga tölvuna en Kristján hefði verið að nota hana. Tók lögreglan þá ákvörðun að skoða og mynda samskiptin sem þar komu fram sem voru á milli Kristjáns og brotaþola í málinu.

Var það mat Héraðsdóms Reykjaness að þessi gögn gætu ekki talist tilgangslaus við sönnunarfærslu í málinu og því var kröfu ákærða hafnað.

Í nýföllnum dómi Hæstaréttar er minnt á að í lögum um meðferð sakamála skuli í skriflegri kæru geta þess hvaða úrskurður sé kærður, kröfu um breytingu á honum og ástæður sem kæran er reist á.

„Í skriflegri kæru varnaraðila til héraðsdóms var hvorki greint frá kröfu um breytingu á hinum kærða úrskurði né þeim ástæðum sem hún væri reist á. Kæran fullnægir því ekki skilyrðum fyrrgreinds lagaákvæðis og verður málinu samkvæmt því vísað frá Hæstarétti.“

Frávísun Hæstaréttar má nálgast hér.