Sauðfjárbændur hundóánægðir og telja sig hlunnfarna

Afurðaverð til sauðfjárbænda eitt hið lægsta í Evrópu. Franskir bændur fá sextíu prósenta hærra verð fyrir afurðir sínar en þeir íslensku.

Afurðaverð til íslenskra sauðfjárbænda er með því allra lægsta sem þekkist í Evrópu. Oft munar tugum prósenta og fá til að mynda franskir bændur 60 prósenta hærra verð en þeir íslensku fyrir afurðir sínar.

Landsamtök sauðfjárbænda hefur tekið saman upplýsingar um þetta og í tilkynningu frá samtökunum kemur fram að hærra verð til bænda í Evrópu þýði ekki endilega að verð til neytenda sé hærra. Það er einfaldlega svo að aðrir bændur í Evrópu fá hærri hluta af útsöluverði til sín. Nefna má sem dæmi að á Bretlandi fá bændur til 50 til 60 prósent útsöluverðs í sinn hlut. Algengt sé að íslenskir bændur fái sem nemur á bilinu 25 til 41 prósent af endanlegu útsöluverði.

Bændur eru að vonum afar ósáttir við þetta. Landssamtökin gerðu verðkönnun í sex verslunum á höfuðborgarsvæðinu miðvikudaginn 27. júlí. Þetta voru Hagkaup, Bónus, Nettó, Krónan, Víðir og Melabúðin. Kannað var verð á ófrosnum lærum og hryggjum. Samkvæmt henni var meðalkílóverð á lambalæri 1.807 krónur á kílóið. Samtökin telja þetta ósanngjarnt en svo virðist sem hverjir, sem skila milljarða hagnaði, „taki til sín svo stóran hluta af verðinu“.

Landssamtök sauðfjárbænda telja ekki boðlegt að afurðarverð til bænda hér á landi sé langt undir meðaltali í Evrópu. „Samtökin vilja vinna með afurðarstöðvum, sem flestar eru reyndar í eigu bænda, að því að leiðrétta skiptingu afurðarverðsins í áföngum á næstu þremur árum,“ segir í tilkynningunni.