Sprenging í Bergstaðastræti: „Toppframleiðandi“

„Okkar tryggingafélag er að skoða málið,“ segir Lúðvík Georgsson, framkvæmdastjóri KR-flugelda, sem flutti inn flugeldaköku sem sprakk með miklum látum í Bergstaðastræti um áramótin.

Rætt var við Guðmund Aðalsteinsson, íbúa í Bergstaðastræti, í kvöldfréttum Stöðvar 2 í gær sem keypti þessa flugeldaköku. Á henni var tendrað skömmu fyrir miðnætti á gamlárskvöldi og reyndist hún vel í byrjun en sprakk síðan með þeim afleiðingum að Guðmundur skarst á andliti, tvö börn fengu skrámur og tjón varð á nærliggjandi húsum og bílum.

„Niðurstaðan er sú að þarna er gölluð kaka sem springur eftir nokkur skot. Flugeldar eru ansi mikil handavinna, það er bara með öll mannanna verk að það geta reynst gallagripir sama hvað menn gera hlutina vel og þarna er kakan gölluð þegar verið er að skjóta henni upp,“ segir Lúðvík við Vísi um málið en hann segir KR-flugelda með ábyrgðartryggingu á flugeldunum sem eru fluttir inn.

Lúðvík setti sig í samband við íbúana í Bergstaðastræti sem munu vera í sambandi við tryggingafélagið sitt og tryggingafélag KR-flugelda.

Hann segir mestu máli skipta að sýna aðgát við meðferð flugelda. Farið sé til að mynda fram á að menn séu í að minnsta kosti 25 metra fjarlægð frá þessum flugeldakökum eftir að tendrað hefur verið á þeim. Þá standi einnig á kökunni að hún sé eingöngu til notkunar utan húss og á stórum og opnum svæðum. „Aðalatriðið er að þarna urðu ekki alvarleg meiðsl, það er stóra málið,“ segir Lúðvík.

Þessi kaka var flutt inn frá Kína og ætlar Lúðvík að vera í sambandi við framleiðandann vegna þessa atviks. „Það er ekkert sem ég geri í dag eða á morgun, ég hitti hann eftir nokkrar vikur og þá mun ég fara yfir þetta með honum. Við höfum verslað við þennan framleiðanda í 30 ár og hann hefur verið afskaplega traustur. Var meðal annars leiðandi í því að innleiða vestrænar aðferðir við flugeldaframleiðslu í Kína á sínum tíma. Flugeldarnir bötnuðu alveg geysilega, þetta er toppframleiðandi, það er ekki annað hægt að segja.“