Segir erfitt að sanna ásetning vegna klámvæðingar

Klámvæðingin hefur haft þær afleiðingar í samfélaginu að erfitt getur reynst að sanna ásetning ákærðra í kynferðisafbrotamálum fyrir dómstólum. Þetta er mat Hildar Fjólu Antonsdóttur sem gerði rannsókn á viðhorfum fagaðila til meðferðar nauðgunarmála innan réttarvörslukerfisins.

Af viðtölum við saksóknara má skilja að aukin klámvæðing í íslensku samfélagi og klámneysla ungra einstaklinga geri það að verkum að mörkin milli kynlífs og ofbeldis séu mjög óskýr.

Í rannsókn Hildar Fjólu er stuðst við viðtöl við einstaklinga sem koma að þessum málum í starfi sínu. Margir viðmælenda töldu sig merkja breytingu á hegðun fólks og áhrif kláms vera augljós meðal ungra einstaklinga. Sumir viðmælenda í rannsókninni töldu sig sjá fjölgun á brotum þar sem brotaþoli og sakborningur kynnast á samskiptamiðlum þar sem eldri karlmenn nálgast ungar stúlkur.

Ingibjörg Elíasdóttir, lögfræðingur hjá Jafnréttisstofu, segir það alvarlegt ef rétt sé. „Það er alveg ljóst að þetta þarf að skoða betur. Í rannsókn Hildar Fjólu eru tekin viðtöl við sérfræðingana í málaflokknum, saksóknara og verjendur, einstaklinga sem eru í miklum samskiptum við þolendur og gerendur. Þessi lýsing rímar að einhverju leyti við þá tilfinningu sem maður hefur og það sem maður heyrir í umræðunni,“ segir Ingibjörg.