Björguðu konu úr köldum sjó

Sérsveitarmenn ríkislögreglustjóra björguðu konu úr sjónum við Sæbraut í gær.

Starfsmenn Ríkislögreglustjóra urðu varir við hróp og köll við húsnæði embættisins við Sæbraut í gær.

Sérsveitarmennirnir hlupu út og sáu konu um 50 metra frá landi í köldum sjónum.

Fólk á bakkanum hafði reynt að telja konuna af því að fara í sjóinn en án árangurs.

Sérsveitarmaður synti á eftir konunni sem gerði enga tilraun til að synda til lands. Sérsveitarmaðurinn synti björgunarsund með hana í land og sjúkraliðar voru kallaðir til að hlúa að henni.

Björgunarmenn höfðu ekki tíma til að klæðast þurrbúningi og þykir því mildi að ekki fór verr.