Hjálmlausar á ljóslausri vespu

Lögregluþjónar á Suðurnesjum stöðvuðu ferð tveggja ungra stúlka á rafmagnsvespu aðfararnótt sunnudagsins síðasta. Vespan var ljóslaus og þar að auki voru þær hjálmlausar og vafðar inn í teppi.

„Lögregla tók þær tali og glömruðu þá í þeim tennurnar af kulda því þær voru klæddar stuttbuxum og sandölum undir teppunum. Stelpurnar sögðust vera á leiðinni í 10/11 til að kaupa sér nammi og vissu að þær væru að brjóta reglur um útivistartíma,“ segir í tilkynningu frá Lögreglunni.

Lögregluþjónarnir fóru með þær á lögreglustöð og var þeim gefið heitt kakó og rætt betur við þær. Þær sögðust vera afar leiðar yfir því að hafa brotið reglur en forráðamönnum þeirra var gert viðvart um ferðalag þeirra.