Jólasveinaskemmtun fyrir fullorðna veldur uppnámi

„Þetta var á laugardaginn. Það er mikið búið að hlæja að þessu. Nei, þetta náði ekki svo langt að fólki yrði verulega brugðið,“ segir Elísabet Thoroddsen hjá LS Retail í samtali við Vísi.

Fyrirtækið var með hlaðborð og jólaskemmtun síðastliðinn laugardag. Og fyrir mistök hafði Elísabet pantað hina mjög svo slæmu jólasveina þá Rassaskelli og Píkusleiki. Samkvæmt frásögn Nútímans tókst á síðustu stundu að afstýra stórslysi en Andrea Ösp Karlsdóttir hjá Jólasveinaleigunni segir að það geti nú aldrei hafa staðið mjög tæpt; þarna hafi nú verið um einhvern misskilning að ræða.

Litlar jólasveinahúfur fyrir geirvörtunum

„Hún pantaði fullorðinsjólasvein og þeir eru mismunandi,“ segir Andrea Ösp í samtali við Vísi. Og hún heldur áfram:

„Við bjóðum uppá burlesque-jólasveinadans, sem er ofboðslega fyndinn og hefur slegið í gegn. Þetta er ekki stripp í þeirri merkingu. Þeir afklæðast að einhverju leyti en einn jólasveinanna okkar er til dæmis með litlar jólasveinahúfur sem hann límir yfir geirvörturnar sínar og svona. Þetta er bara fyndið. Svo eru jólasveinarnir okkar með fullorðinsbrandara en þetta er alltaf algerlega samkvæmt óskum fyrirtækjanna,“ segir Andrea Ösp. Hún bendir á að til að fyrirbyggja misskilning þá hringi jólasveinninn alltaf á undan sér til að vita nákvæmlega hvað það er sem um er beðið. Svona til að hafa vaðið fyrir neðan sig, einmitt til að forðast slysin.

Jólasveinarnir lesa salinn

Andrea Ösp segir að það sé mikið að gera hjá Jólasveinaþjónustunni sem útvegar jólasveinaatriði á jólaglögg, jólahlaðborð, í heimahús þess vegna; jólaskemmtanir af hvers kyns toga. „Og svo sendum við stundum einn til tvo jólasveina sem fara með fullorðinsbrandara, mismunandi klúra eftir því hvað fólk vill.“

Og svo lesa jólasveinarnir náttúrlega salinn eins og góðum skemmtikröftum sæmir, ef fólk vill meira fjör, fær það meira fjör. Og það er greinilega mikið að gera hjá Jólasveinaþjónustunni, mikið um pantanir því meðan blaðamaður ræddi við Andreu hringdi síminn stanslaust og pöntunum rigndi inn. Það hefur augljóslega orðið þróun í þessum geira frá því Davíð Oddsson var atvinnujólasveinn og tróð upp ásamt Katli Larsen.

Jólasveinaþjónustan, sem nú er á 9. starfsári, er með tæpa 20 jólasveina á sínum snærum sem flengjast um víðan völl, Grýlu og tónlistarmenn. Andrea segir mikinn metnað liggja í starfseminni og séu starfsmenn ýmist reyndir áhugaleikarar eða lærðir sem slíkir.