Borgin fylgdi ekki ábendingum innri endurskoðunar um innkaup

„Skemmst er frá því að segja að engar ábendingar í skýrslu Innri endurskoðunar frá árinu 2010 hafa fengið fullnægjandi úrbætur og umbótaverkefni hafa einungis að litlu leyti verið unnin,“ segir í úttekt Halls Símonarsonar, innri endurskoðanda Reykjavíkurborgar.

Innri endurskoðun gerði vorið 2010 úttekt á innra eftirliti hjá innkaupaskrifstofu borgarinnar. Meðal 12 meginatriða sem sagt var að þyrfti að bæta var gegnsæi í innkaupastefnu, mæling á árangri, fagleg vinna, skráning upplýsinga og skilgreining ábyrgðar þeirra sem koma að innkaupum.

Fulltrúar Sjálfstæðisflokks segja úttekt innri endurskoðanda nú um það hvernig ábendingunum frá 2010 hafi verið fylgt eftir vera mikinn áfellisdóm yfir því hvernig staðið sé að innkaupum á vegum borgarinnar. Þrátt fyrir fjölmörg varnaðarorð og ábendingar frá innri endurskoðanda um það hvernig bæta megi innkaupaferlið sé nú „ljóst að ekkert hefur verið gert með þessa mikilvægu vinnu“, eins og segir í bókun þeirra.

S. Björn Blöndal, formaður borgarráðs úr Bjartri framtíð, segir að eftir að nýr meirihluti tók við í borgarstjórn 2010 hafi innkaupareglur verið endurskoðaðar.

„Gagnrýnin beinist fyrst og fremst að því að of lítill hluti af almennum vörukaupum fari í útboðsferli eða í gegnum rammasamninga. Það hefur hins vegar verið að aukast, var sagt 14 prósent í skýrslunni en er komið í 25 prósent núna,“ segir Björn.

Þá segir Björn innri endurskoðun telja heppilegra að auka miðstýringu í innkaupum. Starfsstöðvar borgarinnar séu um 500 og aðilar sem hafi heimild til innkaupa séu um eitt þúsund. „Það má alveg fallast á að það sé of mikið,“ segir Björn sem kveður sjálfstæðismenn hins vegar oftúlka úttektina. „Þetta er ekki áfellisdómur yfir innkaupum borgarinnar en það er hins vegar ekki nægilega gott að það sé ekki brugðist með nægilega ákveðnum hætti við ábendingum sem koma fram í skýrslunni 2010.“

Borgarráð beindi því til fjármálaskrifstofu að fara ítarlega yfir ábendingar innri endurskoðunar. „Við reynum að bæta úr því sem bæta þarf,“ segir S. Björn Blöndal.