Skoða mögulegan samruna þriggja háskóla

Menntamálaráðuneytið skoðar um þessar mundir möguleika á auknu samstarfi og jafnvel samruna Landbúnaðarháskólans, Háskólans á Hólum og Háskólans á Bifröst. 

„Þetta mál er alveg á byrjunarstigi og fellur undir þá vinnu sem við erum að vinna í ráðuneytinu um stöðu háskólastigsins almennt,“ segir Illugi Gunnarsson menntamálaráðherra.

„Það er verið að skoða háskólana á Íslandi í alþjóðlegu samhengi, fjármögnun þeirra og hvaða sóknarfæri skólarnir eiga. Hluti af þeirri vinnu er auðvitað að skoða minni skólana og hvaða möguleika við höfum á að efla þá.“

RÚV greindi fyrst frá. Illugi segir gagnaöflun farna af stað til að skoða hvaða tækifæri myndu felast í þessu samstarfi, með það fyrir augum að bæta akademískt starf og ráða úr talsverðum fjárhagsvanda þeirra. Illugi er meðal þeirra sem hafa viðrað þá skoðun sína að íslenskir háskólar séu of margir og lagði hann í fyrra til sameiningu Landbúnaðarháskólans og Háskóla Íslands.

„Því miður, vil ég segja, mætti sú hugmynd töluvert mikilli andstöðu,“ segir Illugi. „Það náði þá ekkert lengra. En þessi vinna er alveg ótengd því.“

Vilja styrkja byggð um leið

Ráðherra hefur verið í sambandi við rektora skólanna þriggja og segist vonast eftir samstarfi frá þeim við að skoða möguleikann á aukinni samvinnu.

„Það eru auðvitað allir mjög tilbúnir til að skoða allar mögulegar leiðir sem menn hafa til að efla skólana,“ segir Illugi. „Bæði starf þeirra og um leið að skjóta styrktarstoðum undir byggðirnar þar sem þeir eru staddir.“

Illugi segist vonast til að greiningarvinnu ráðuneytisins ljúki í næsta mánuði og að þá verði jafnframt komin einhver mynd á möguleika á samruna skólanna þriggja.

„Ef einhverjir eru,“ segir hann. „Kannski leiðir þessi vinna í ljós að svo sé ekki og þá er það ákveðin niðurstaða.“