Akureyrarbæ gengur vel í dómsal

Á fundi bæjarráðs Akureyrar í morgun lagði bæjarlögmaður fram yfirlit um kæru– og úrskurðarmál á hendur bænum á árunum 2000–2014. Þar kemur fram að á þessu árabili hafa 70 kærur verið lagðar fram og úrskurðað um þær í 79 niðurstöðum eða ákvörðunum.

Í 25 tilfellum var ákvörðun bæjarins úrskurðuð ógild en í samtals 54 tilfellum var dæmt Akureyrarkaupstað í vil, þar af var 23 málum vísað frá og í 31 tilfelli var kröfu kæranda hafnað og ákvörðun bæjarins staðfest.

Þetta kemur fram í tilkynningu frá Akureyrarbæ. Flest eru kærumálin á sviði skipulags– og byggingarmála eða 41 og þar var í 29 tilfellum dæmt Akureyrarkaupstað í vil en 12 sinnum var ákvörðun bæjarins ógilt. Næstfjölmennasti flokkurinn er útboðsmál þar sem ákvarðanir bæjarins voru tvisvar ógildar en 8 sinnum dæmt bænum í vil.

Bæjarstjórinn á Akureyri, Eiríkur Björn Björgvinsson, segir að þessar niðurstöður séu eins og við var að búast og að hann eigi ekki von á að fjöldi kæru– og úrskurðarmála sé meiri eða minni í öðrum sveitarfélögum sé miðað við íbúafjölda.

„Aðalatriðið finnst mér vera að þessi mál séu öll uppi á borðinu því í öllum framkvæmdum bæjarins á að ríkja opin og gagnsæ stjórnsýsla þar sem hver og einn getur leitað réttar síns finnist honum á einhvern hátt á sér brotið. Í því samhengi er gott að fá fram þetta yfirlit bæjarlögmanns til að sjá hvernig staða þessara mála er í raun og veru,“ segir Eiríkur Björn.