Portrett af öllum þingforsetum síðan 1900

Portrett Alþingis eru nú 52 talsins, meirihlutinn af forsetum Alþingis. Sum eru í Alþingishúsinu en önnur í húsum þingsins í nágrenni þess. Verkin eru án efa merk heimild í listasögu Íslands og nú síðast var síðastliðinn föstudag afhjúpuð mynd af Sturlu Böðvarssyni forseta þingsins frá 2007 til 2009, sem Baltasar Samper málaði.

Sum verða umdeild eins og verk Stephen Lárus Stephen listmálara, sonar Karólínu Lárusdóttur listakonu sem málaði portrettið af Sólveigu Pétursdóttur árið 2012 og þótti ónefndum listfræðingi Sólveig sitja þar í einkennilega líkri stellingu og Móna Lísa. „Þetta er bara gömul hefð, það eru engar skrifaðar reglur um þetta", sagði Helgi Bernódusson, skrifstofustjóri Alþingis í fréttum Stöðvar tvö í kvöld.

Tækifæri fyrir listamenn

Flest verkin hafa fjórir listamenn málað, þeir Gunnlaugur Blöndal, Baltasar, Einar Hákonarson og Ásgeir Bjarnþórsson. Alþingi velur listamanninn í samráði við þann sem mála á. Helgi telur að portrettin eigi enn erindi í dag. „Við höfum ekki síður þetta sem tækifæri fyrir myndlistamenn til að spreyta sig á portrett. Þetta er list, og þetta er merkilegt safn. Forseti Alþingis er einn af handhöfum forsetavalds og hann er forystumaður þjóðþingsins þannig að okkur finnst alveg ærið tilefni til þess að sýna honum mikinn sóma", segir Helgi.

Gott að hafa þingskörunga á veggjunum

Um það bil eitt verk er pantað á hverju kjörtímabili. Helgi segir gott að hafa þau uppi við í húsinu „Mér finnst líka að mörgu leyti mjög gott að hafa þessa menn hér á veggjum. Þetta eru yfirleitt þingskörungar og þeir eru hér með augun á okkur. Mér finnst fara vel á þessu".

Ekki er nægt pláss í Alþingishúsinu fyrir myndirna og þarf að bæta úr því, segir Helgi. Ekki hefur enn verið hafist handa við gerð Portretts af síðasta þingforseta, Ástu Ragnheiði Jóhannesdóttur.