Þriggja ára barninu heilsast vel líkt og hinum

Reiknað er með því að sjö íslenskir ferðalangar, sem höfðust við í nótt í sérútbúnum bílum sínum um fimm kílómetra austur af Laugarfelli, verði komnir til Akureyrar á sjöunda tímanum í kvöld. Ferðin sækist hægt í snjónum.

Skúli Árnason, svæðisstjóri björgunarsveitanna á Norðurlandi, segir í samtali við Vísi að fólkið hafi verið á þremur sérútbúnum bílum og í samfloti. Björgunarsveitarmenn á snjóbílum komu fólkinu til aðstoðar í morgun en þá hafði það hafst við í einum bílanna í nótt.

Fólkið hafði ekki verið í símasambandi síðan klukkan tíu í gærkvöldi þegar það óskaði eftir aðstoð björgunarsveitar. Þá voru bílar þeirra orðnir eldsneytislitlir.

Skúli segir heilsu fólksins góða eftir því sem þau best viti.

„Öllum heilsaðist bara vel,“ segir Skúli. Reiknað er með fólkinu til byggða á sjötta tímanum og til Akureyrar á þeim sjöunda.

Post by Slysavarnafélagið Landsbjörg.