Dæmi um að börn forðist sturtuferðir vegna ótta við myndatökur

Sífellt yngri börn eru komin með snjallsíma og eru dæmi um að börn allt niður í annan bekk í grunnskóla séu að fara óvarlega á netinu. Verkefnastjóri hjá SAFT segir ókunnuga oft nota þessa tækni til að nálgast börn sem oft skorti hyggjuvit til að nota á hana rétt.

Samstarfshópurinn „Náum áttum" stóð fyrir fundi í dag þar sem snjalltækjanotkun barna og unglinga var rædd og þá sérstaklega út frá skólastarfi. Einn þeirra sem fylgist vel með snjallsímanotkun barna er Björn Rúnar Egilsson verkefnastjóri hjá Heimili og skóla og hélt hann erindi í dag. Hann segir þróunina hraða og sífellt yngri börn vera komin með snjalltæki til umráða.

Málin hjá sífellt yngri krökkum

„Síðustu ár vorum við aðallega beðin að koma og tala við unglingabekkina en núna eru skólarnir að átta sig á því að yngri og yngri börn eru að fá þessi snjalltæki og koma með þau í skólann þannig að núna hefur áherslan aðallega verið hjá okkur að fræða sjötta og sjöunda bekk,“ segir hann. „Það eru allskonar mál að koma upp. Alveg niður í fjórða, þriðja og jafnvel annan bekk þar sem kannski krakkar eru að fara óvarlega á netinu og það hefur alvarlegar afleiðingar.“

Hann segir börnin oft lenda í erfiðum aðstæðum á netinu. Sum þeirra hafi til að mynda nýtt sér app sem heitir Chatroulette þar sem þau lenda í myndbandspjalli við einhvern handahófskenndan sem þau vita ekkert um. „Mjög mörg börn lent í því að ókunnugir séu að reyna að hafa samband við þau og fylgjast með þeim á netinu, kannski þá einhver sem enginn í jafningjahópnum eða fjölskyldunni  kannast við,“ segir Björn. 

Þekkja ekki mörkin

„Svo eru líka að koma upp myndbirtingarmál þar sem verið er að taka myndir í leyfisleysi. Við höfum jafnvel heyrt af því að krakkar þori ekki lengur að fara í sturtu í leikfimi af því að þeir eru hræddir um að einhverjir muni taka af þeim mynd,“ segir hann og bætir við að birtingarmyndir snjalltækjanotkunar vera margar.

„Þó svo að þau kunni betur á tæknina heldur en foreldrarnir þá þýðir það ekki að þau hafi nógu mikið hyggjuvit til að nota hana rétt og á ábyrgan hátt. Þannig þau gera sér ekki alveg grein fyrir því að hvað sé í lagi að deila á netinu, hverskonar myndir er í lagi að senda og hvað sé í lagi að segja við aðra og um aðra á netinu,“ segir Björn.

Vill að foreldrar kynni sér málið

Linda Heiðarsdóttir, aðstoðarskólastjóri Laugalækjarskóla, skorar á foreldra að kynna sér hvað krakkarnir eru að gera í snjallsímanum. „Það er ekkert að því að foreldri fái að vita hvaða öpp eru á skjáborðinu,“ segir hún og segir sjálfsagt að spyrja hvað öppin gera.

„Við erum að sjá kannski að málin sem eru að koma til okkar eru að breytast. Mál sem eru að koma upp í skólanum tengjast gjarnan samfélagsmiðlunum. Það er þá ábyrgð okkar að taka þátt í því að leysa málin, setja okkur inn í málin í málin, þannig að við þurfum að vera upplýst um hvað krakkar eru að gera á netinu,“ segir hún.

„En það er ekki síður foreldranna líka og það er eiginlega  það sem við erum búin að vera að gera síðan í haust, að vera með fræðslu fyrir foreldrana, auka fræðslu til nemenda, auka samstarfið við félagsmiðstöðina, af því þau fá oft aðrar upplýsingar en við og koma til okkar, sem við getum síðan komið til foreldra,“ segir hún.