Kona í Breiðholti tók við símtölum forsætisráðuneytisins

Símtölum sem ætluð voru forsætisráðuneytinu var í morgun beint í farsíma Ingibjargar Sigurvinsdóttur, íbúa í Breiðholti.  

Greint er frá málinu á vef RÚV en um mistök var að ræða þar sem vaktmaður í stjórnarráðinu hafði slegið inn rangan tölustaf í símanúmerið þangað sem hann ætlaði að áframsenda símtöl til forsætisráðuneytisins.

Í samtali við Vísi segir Ingibjörg að hún hafi ekki tekið við mörgum símtölum í morgun. Þetta hafi einfaldlega verið skemmtileg uppákoma sem hafi lyft hversdeginum.

„Þetta var nú bara skemmtilegt. Ég svaraði engum fyrirspurnum og það hringdi enginn frá útlöndum þannig að þetta var í fínu lagi. Ég hafði bara gaman að þessu og þetta lyfti hversdeginum,“ segir Ingibjörg.

Aðspurð segir Ingibjörg að ritari forsætisráðuneytisins hafi haft samband við sig í morgun og sagt að um bilun hlyti að vera að ræða hjá þeim sem yrði löguð.