Fjórtán hrefnum landað framhjá vigt

Fjórtán hrefnum var landað framhjá vigt á síðasta veiðitímabili. IP útgerð ehf. var eina fyrirtækið sem hafði veiðileyfi á hrefnu í fyrra og landaði 24 hrefnum á land. „Ef afli er ekki vigtaður þá hafa stjórnvöld ekki upplýsingar um það magn sem kemur að landi,“ segir Eyþór Björnsson fiskistofustjóri.

Veiðum á hrefnu er þannig háttað að kjöti og spiki er landað, en beinagrind og öðru sem ekki er nýtt af dýrinu er fleygt aftur í hafið. Því hafa stjórnvöld enga vitneskju um hversu mörg kíló koma inn til vinnslu hjá útgerðinni ef afli er ekki vigtaður. Eyþór fiskistofustjóri segir að samkvæmt reglugerð þurfi allur landaður afli að fara á hafnarvog svo hægt sé að fylgjast með að einhverju marki.

Sigurður Ingi Jóhannsson sjávarútvegsráðherra segir einnig í svari sínu við fyrirspurn Katrínar Jakobsdóttur að í hrefnuveiðum skuli landaður afli vigtaður í samræmi við reglugerð, um vigtun og skráningu sjávarafla.

Þessu hafnar Gunnar og segir að stjórnvöld hafi mjög glögga mynd af meðalþyngd dýrs eftir tilraunaveiðar á hrefnu. „Ef tilgangur með vigtun sé að finna út meðaltalsnýtingu á hrefnu þá hefur þeim markmiðum þegar verið náð,“ segir Gunnar.

Á síðasta hrefnuveiðitímabili var uppi ágreiningur um það hvort hrefnu ætti að landa á vigt eða hvort nægilegt væri að senda Fiskistofu upplýsingar um fjölda veiddra dýra. Gunnar Bergmann, framkvæmdastjóri IP útgerðar, segir veiðarnar frábrugðnar veiðum á fiski. „Kvótastýringin á þessum ólympísku veiðum fer eftir fjölda dýra en ekki fjölda kílóa eins og í þorski eða ýsu og öðrum stofnum. Þess vegna fannst okkur óþarft að keyra með landaðan afla á hafnarvog með tilheyrandi kostnaði,“ segir Gunnar. „Um leið og við veiðum dýr sendum við Fiskistofu tilkynningu og það gerum við rafrænt um borð um leið og dýr hefur verið veitt.“

„Fiskistofa fékk tilkynningu frá Hafnarfjarðarhöfn síðasta sumar að afli væri að fara framhjá vigt. Í þessu tilviki var hrefnuveiðibátur ekki að fara eftir reglum. Það fór síðan í ferli hjá okkur sem endaði með áminningu. Ítrekunaráhrif áminningar eru tvö ár og ef sami aðili brýtur aftur af sér innan þess tíma á hann yfir höfði sér veiðileyfasviptingu,“ segir Eyþór Björnsson fiskistofustjóri.