Meirihluti andvígur því að ríkið selji eignarhlut sinn í Landsbankanum, Landsvirkjun og RÚV

Af þeim sem tóku afstöðu sögðust 41,5% fylgjandi því að ríkið myndi selja eignarhlut sinn í Landsbankanum, borið saman við 45,6% í janúar 2012. Þetta kemur fram í nýrri könnun MMR.

28,9% sögðust fylgjandi því að ríkið myndi selja eignarhlut sinn í Ríkisútvarpinu nú, borið saman við 22,8% í janúar 2013. Aðeins voru 13,2% fylgjandi því að ríkið myndi selja eignarhlut sinn í Landsvirkjun nú, borið saman við 19,6% í janúar 2012.

Í könnun MMR kemur fram að þeir sem styðji ríkisstjórnina séu hlynntari því að einkavæða Ríkisútvarpið.

Þrátt fyrir að meirihluti væri andvígur einkavæðingu ríkisfyrirtækja var viðhorf breytilegt á milli hópa. Ber þar helst að nefna að hlutfallslega fleiri þeirra sem styðja ríkisstjórnina sögðust vilja einkavæða Ríkisútvarpið en þeirra sem ekki styðja ríkisstjórnina. 

Af þeim sem tóku afstöðu og styðja ríkisstjórnina sögðust 45,2% vera fylgjandi því að einkavæða Ríkisútvarpið, borið saman við 19,6% þeirra sem ekki styðja ríkisstjórnina.