Vekja athygli á fjölbreyttum birtingarmyndum mismunandi sjónskerðinga

Blindrafélagið hleypti í dag af stað kynningarátakinu Blindir Sjá. Það var gert við troðfullan hátíðarsal Menntaskólans í Hamrahlið. Bergvin Oddson, formaður Blindrafélagsins, flutti ávarp og eftir það var nýtt kynningarmyndband átaksins frumsýnt.

Blindir sjá er ætlað að vekja athygli á fjölbreyttum birtingarmyndum mismunandi sjónskerðinga. Á vef Blindrafélagsins segir að það að vera blindur sé ekki eingöngu á/af ástand, full sjón eða engin sjón. Rétt sé að langflestir sjái eitthvað.

„Gert hefur verið stutt kynningarmyndband sem sýnir í gegnum mismunandi sjónskerðingarhermun hvernig ung sjónskert manneskja gæti upplifað ýmislegt af því sem ungt fólk tekur sér fyrir hendur. Svo sem eins og að koma sér á fætur á morgnanna, fara í fallhlífarstökk, vera á tónleikum, fara í sund og kyssa. Myndskeiðinu er meðal annars ætlað að leiðrétta þær ranghugmyndir að tilvera blindra og sjónskertra sé öll svört.“

Auk þess að sýna myndbandið víð verða settar upp filmur á klósett í skólum landsins og þar verður hægt að spegla sig í gegnum mismunandi tegundir af sjónskerðingu. Þá mun filmum sem hægt er að setja á myndavélar á símum og veita þannig sjónskerta sýn í gegnum símann verða dreift í skólum landsins.