„Við erum í rauninni ekki til“

Jón Gnarr veltir tilveru sinni fyrir sér í nýjasta pistli sínum í Fréttablaðinu í dag. Þar setur hann fram spurningar eins og: Hver er ég? hvaðan kem ég? og hvert fer ég?. Þar að auki veltir Jón fyrir sér af hverju hann geri hlutina svona en ekki hinsegin og af hverju hann endurtaki sömu mistökin.

„Mér hefur oft liðið eins og farþega í því farartæki sem er Ég.“

„Af hverju get ég ekki vanið mig af ósiðum? Listinn er endalaus. Mér hefur oft fundist eins og ég sé leiddur áfram inn í og í gegnum aðstæður. Eins og einhver utanaðkomandi öfl séu að stýra mér.“

Jón segist hallast að því að um innsæi sé að ræða.

„Maður fylgir innsæinu sínu, það er ekki alltaf meðvitað. Og það er ekki guð, eða skrattinn, draugurinn hennar ömmu eða Mikael erkiengill sem er að leiða okkur áfram heldur heilinn í okkur.“

Eftir langa leit segist Jón hafa komist að því að ástæða þess að hann hafi ekki fundið sig, sé að hann sé í rauninni ekki til.

„Ég er einungis líffræðilegt vélmenni, stjórnað af ofurtölvu sem er heilinn í mér. Þessi tölva stjórnar mínu lífi, skynjunum og upplifun af raunveruleikanum. Og hún takmarkar mig. Ég sé bara ákveðna liti og get einungis skynjað nokkrar víddir.“

Því segir Jón að það sem að hann upplifir að hann hafi sagt í pistli sínum sé þar af leiðandi misskilningur. Að heilinn í Jóni sé að nota hans „fabrikeruðu“ persónu til að koma gögnum í heilann á okkur.

„Það er verið að spila með okkur af okkur sjálfum. En við getum slakað á og reynt að hafa gaman af því. Við erum í rauninni ekki til og því engin ástæða til að vera hræddur eða reiður. It's just a ride! Góða helgi.“