Sigmundur Davíð sagður einn lágkúrulegasti forsætisráðherra frá upphafi

Hressilegar umræður stóðu á þingi um atkvæðagreiðslu um hvort halda ætti kvöldfundi um fjárlög eða ekki. Sigmundur Davíð Gunnlaugsson kom meðal annarra í pontu og lýsti því yfir að stjórnarandstaðan ætlaði greinilega að slá Íslandsmet í málþófi, met sem stæði sennilega um alla eilífð. Hann hvatti menn til að endilega leyfa stjórnarandstöðunni að eiga sviðið.

Fjöldi þingmanna kom í pontu og lýsti því yfir að ekkert óeðlilegt væri við það þó menn vildu ræða fjárlögin, Kristján Möller þingmaður Samfylkingar taldi það einsýnt að það þyrfti að gera, tala röddu aldraðra og öryrkja sem stæðu fyrir utan Alþingishúsið í þessum töluðum; afturvirk hækkun mánaðarlegra bóta þeirra myndi nema 17 þúsundum fyrir skatt, það væru nú öll ósköpin. Stjórnarandstaðan vildi tala máli þess hóps.

Fjöldi þingmanna stjórnarandstöðunnar vildi vísa á bug ásökunum um málþóf en, einkum virðist grunnt á því góða milli Sigmundar Davíðs og Bjartrar framtíðar. Róbert Marshall sagði það athyglisvert að forsætisráherra vildi koma hér upp sem fulltrúi þeirrar ríkisstjórnar sem lengst frí hefur tekið. Og hóta því að ríkisstjórnin muni ekkert funda meðan þessi umræða fer fram. Og telja daga. „Á sama tíma er mjög stór hluti þjóðarinnar farin að telja niður dagana þangað til ríkisstjórn Sigmundar Davíðs Gunnlaugssonar fari frá völdum. Þessi einhver sú versta ríkisstjórn sem hér hefur setið og einhver sá lágkúrulegasti forsætisráðherra sem nokkru sinni hefur vermt það sæti.“

Urðu nokkur hróp og köll í þingsal og ekki síður þegar Róbert kom aftur í pontu, en þá gat hann varla komið því frá sér sem hann vildi sagt hafa, varðandi að það gæti varla talist óeðlilegt að vilja ræða fjárlög, vegna frammíkalla Gunnar Braga Sveinssonar utanríkisráðherra, sem Róbert bað um að hafa hægan og leyfa öðrum að tjá sig. „Þetta er rakinn dónaskapur,“ sagði Róbert um utanríkisráðherra.

Hér má hlusta á umræðurnar.