Lars: Spiluðum ekki illa

„Þetta voru kjánaleg mörk sem við fengum á okkur en við spiluðum ekki illa,“ sagði Lagerbäck við Vísi eftir leik Póllands og Íslands í kvöld. „Það hljómar kannski furðulega en við vorum heilt yfir ekki slakir.“

Ísland komst yfir gegn Pólverjum í Varsjá í kvöld en tapaði að lokum, 4-2, eftir slæman síðari hálfleik.

„Við fengum mörk á okkur eftir tvær skyndisóknir þar sem leikmenn eiga að vita betur sínar stöður en þeir gerðu í kvöld. Svo kom mark eftir horn þar sem við gátum ekki hreinsað,“ sagði þjálfarinn.

„En það er alveg ljóst að við spiluðum við gott lið sem var betra en við í kvöld. Þegar leikmaður eins og Robert Lewandowski er í hinu liðinu þá verður þér refsað.“

Hann segir að það sé jákvætt að geta unnið með mistök. „Mistökin geta hvatt mann áfram og það er gott að geta lært af þeim. Lærdómur þessa leiks er að við eigum að halda okkur við okkar leikstíl og taka ekki rangar ákvarðanir.“

Lagerbäck hefur ekki áhyggjur af því að Ísland hefur nú leikið fjóra leiki í röð án sigurs. „Alls ekki. Þessir tveir leikir [gegn Póllandi og Slóvakíu] eru fyrstu tvö skrefin okkar í undirbúningnum fyrir EM og þetta gefur okkur eitthvað til að vinna með.“

Arnór Ingvi Traustason og Hólmar Örn Eyjólfsson fengu tækifæri í byrjunarliðinu í kvöld og Lagerbäck var ánægður með þeirra framlag.

„Það er erfitt fyrir hann að koma inn úr sænsku deildinni enda andstæðingurinn í kvöld mun sterkari en hann á að venjast. En hann stóð sig vel og Hólmar líka.“

„Almennt er ég ánægður með þá reynslu sem strákarnir fengu í kvöld. Þetta var leikur gegn sterku liði, á erfiðum útivelli fyrir framan fullt af áhorfendum.“

Kolbeinn Sigþórsson fór meiddur af velli í kvöld en Lagerbäck segir enn óvitað hversu alvarleg þau eru. Þá fékk Aron Einar Gunnarsson högg á vöðva í fæti.

„Kolbeinn var með mikla verki og gat ekki haldið áfram. Hann er spurningamerki fyrir þriðjudaginn,“ sagði Lagerbäck sem segir að þjálfarnir muni nú meta hvaða leikmenn fái að spila í Slóvakíu.

„Hugmyndin var að skipta út leikmönnum á milli leikja en við verðum að taka mið af stöðunni á hópnum og við vitum meira um það á morgun.“