Sýknuð af ákæru um rangar sakargiftir

27 ára kona var í dag sýknuð í Hæstarétti af ákæru um rangar sakargiftir. Áður hafði hún verið sakfelld í héraði og dæmd í níu mánaða skilorðsbundið fangelsi.

Konunni var gert að sök að hafa haft uppi rangar sakargiftir með því að hafa gefið rangan framburð hjá lögreglu í Danmörku um að maður hefði gert tilraun til að þvinga sig til kynferðismaka. Maðurinn neitaði sök en í skýrslu konunnar hjá lögreglu var staðhæft að hún hefði játað að hafa borið manninn röngum sökum.

Í skýrslutöku hjá lögreglu sagði konan að maðurinn hefði tekið handlegg hennar og snúið honum aftur fyrir bak hennar. Hún hefði veitt mótspyrnu en maðurinn sett hönd sína yfir munn hennar og haldið henni fastri. Þá hafi maðurinn káfað á brjóstum hennar en skömmu síðar kom maður aðvífandi með þeim afleiðingum að styggð hafi komið að manninum og hann sleppti konunni.

Ekki eru til hljóðupptökur af skýrslunum frá í Danmörku og að auki hafði konan ekki undirritað þær. Skýrslurnar geymdu ekki samtal hennar og lögreglunnar staf fyrir staf heldur voru þær aðeins stutt samantekt af því sem hafði komið fram. Var það mat Hæstaréttar að erfitt væri að ráða úr því að konan hefði játað að bera manninn röngum sökum.

Konan bar því við fyrir dómi að hún hefði ekki játað að hafa borið manninn röngum sökum heldur hefði hún aðeins ætlað að draga kæru sína til baka. Dómurinn féllst á að ekki væri hægt að sakfella konuna á skýrslunum einum saman og var hún því sýknuð.