Innlent

Fíkniefnahundar leituðu á nemendum FB á leið í busaferð

Atli Ísleifsson og Sunna Kristín Hilmarsdóttir skrifa
Frá aðgerðum lögreglu í dag við FB.
Frá aðgerðum lögreglu í dag við FB. vísir

Fíkniefnahundar voru notaðir til að leita á nemendum Fjölbrautarskólans í Breiðholti sem voru á leið í busaferð fyrr í dag.

Magnús Ingvason, aðstoðarskólameistari FB, segir að ekkert hafi fundist á nemendunum og að þetta sé einungis gert í forvarnarskyni.

„Allir sem ætluðu í ferðina mættu með sinn farangur og allt var í góðu lagi,“ segir Magnús, en skólinn átti sjálfur frumkvæði að aðgerðinni. Magnús segir að þetta hafi ekki verið í fyrsta sinn sem þetta er gert.

„Þetta hefur verið gert í eitt og eitt skipti og það eru einhver ár síðan þetta var síðast gert. Þá var leitað hátt og lágt í skólanum hérna. Þá fannst ekki neitt heldur. Við viljum að skólastarfið og skemmtanir á vegum skólans séu algjörlega fíkniefnalausar.“

Aðspurður um hvort nemendur hafi tekið vel í þetta segir Magnús að viðbrögðin hafi alls ekki verið slæm í dag.

„Þeir sem eru ekki með fíkniefni mæta bara, það er þefað af töskunum þeirra, ekkert finnst og þetta tekur skamman tíma.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.