„Það er svo mikil þrýstingur alltaf að vera fullkominn“

„Það er svo mikill þrýstingur þessa dagana að vera fullkominn. Heimilið þarf alltaf að glansa og hver einasta horn skal vera stíliserað. Börnin eru síðan alltaf brosandi,“ segir Alexandra Ósk Sigurjónsdóttir í samtali við Vísi. Hún er ein þeirra sem bloggar inn á vefsíðunni Fagurkerar.is. Nú fyrir skemmstu birti hún þar færslu sem heitir Það sem Facebook fær ekki að sjá.

Alexandra er 26 ára og á tvær dætur, hina þriggja ára Zoe Ósk og Philippu-Isabelle sem er ný orðin árs gömul. Í færslunni telur Alexandra upp fimm atriði sem hún sleppir því vanalega að deila með umheiminum.

Þar má sjá mynd af dóttur hennar láta reyna á hve miklu hún geti ráðið en að sögn Alexöndru er hún afar sjálfstæð. Einnig sést önnur dóttir hennar japla á ís snemma morguns er hún var að taka tennur. „Samkvæmt samfélagsmiðlum er ég holla mamman með græna smoothie-inn og nýbakaðar hveitibollur í hádeginu,“ skrifar hún við myndina.

„Ég held það séu ansi margir sem finna fyrir einhverri pressu frá samfélaginu í gengum Facebook, Instagram og fleiri miðla. Ég er þeirra á meðal,“ segir Alexandra og bætir við að þó hún viti að raunveruleikinn sé ekki svona mikið glans þurfi hún að minna sig á það öðru hvoru. „Það hafa nokkrir haft samband við mig og sagt að þeir tengi við þessa hluti. Það er mjög gaman að sjá það.“

Hægt er að skoða blogg Alexöndru með því að smella hér.