Stefán Ragnar fylgir Ásmundi til Eyja

Varnarmaðurinn Stefán Ragnar Guðlaugsson er farinn til ÍBV á láni frá Fylki en hann mun klára tímabilið með Eyjamönnum.

Hjá ÍBV hittir Stefán fyrir Ásmund Arnarsson sem þjálfaði hann hjá Fylki.

Stefán, sem er frá Selfossi, lék níu leiki með Fylki í Pepsi-deildinni í sumar en hefur ekkert komið við sögu hjá liðinu eftir að Hermann Hreiðarsson tók við því af Ásmundi.

Stefán fær ekki leikheimild með ÍBV fyrr en á morgun og getur því ekki verið með Eyjamönnum gegn KR í undanúrslitum Borgunarbikarsins í kvöld.

Leikur KR og ÍBV hefst klukkan 18:00 og verður sýndur í beinni útsendingu á Stöð 2 Sport. Einnig verður hægt að fylgjast með leiknum í beinni textalýsingu á Vísi.