Gunnar Bragi fundaði í Malaví

Heimsókn Gunnars Braga Sveinssonar utanríkisráðherra til Malaví lauk í dag en á meðan heimsókninni stóð fundaði Gunnar Bragi með utanríkisráðherra Malaví, ráðherra sveitarstjórnarmála og ráðuneytisstjóra fjármálaráðuneytisins vegna samstarfs ríkjanna í þróunarsamvinnu.

Á fundinum var einnig rætt um viðræður um ný markmið í þróunarsamvinnu, jarðhitamál og mannréttindi en Ísland hefur starfað í þróunarsamvinnu við Malaví í 25 ár.

Gunnar Bragi fundaði einnig með fulltrúum annarra gjafaríkja, UNWomen, UNICEF, WFP, IMF og heimsótti skrifstofu Rauða Krossins sem bæði RKÍ og utanríkisráðuneytið hafa stutt.

Þá fór Gunnar Bragi til Mangochi-héraðs þar sem íslensk stjórnvöld hafa stutt við uppbyggingu um árabil í gegnum verkefni Þróunarsamvinnustofnunar Íslands. Í tilkynningu segir að Mangochi er talið eitt af fátækustu héruðum Malaví.

Utanríkisráðherra fundaði með héraðsyfirvöldum og heimsótti héraðssjúkrahúsið, grunnskóla og þorp þar sem byggðar hafa verið vatnsveitur. Í Mangochi er verið að byggja fæðingadeild fyrir íslenskt þróunarfé í samvinnu við héraðið sem mun þjónusta milljón íbúa héraðsins.

Vöntun er á fæðingarþjónustu þar sem meira en 60 fæðingar eiga sér stað á hverjum degi innan Mangochi á núverandi heilsugæslum.

Í tilkynningur segir að verkefni ÞSSÍ í héraðinu séu margþætt héraðsþróunarverkefni þar sem stutt er við uppbyggingu á sviði lýðheilsu, menntunar og vatns- og hreinlætismála.

Árið 2015 renna 26 prósent af heildarframlögum ÞSSÍ til Malaví auk marghliða aðstoðar frá utanríkisráðuneytinu í gegnum alþjóðastofnanir sem Ísland á aðild að.