Öryggisvörður slóst við þjófa í nótt

Öryggisvörður í matvöruverslun í vesturborginni meiddist í átökum við þjófa seint í gærkvöldi og þurfti að leita aðhlynningar á slysadeild.

Fjórir menn komu inn í verslunina á tólfta tímanum og reyndi einn að draga athygli vaqrðarins að sér á meðan hinir þrír fóru ránshendi um verslunina. Vörðurinn ætlaði að varna þeim öllum útgöngu og kom þá til ryskinga.

Tveir sluppu út , vörðurinn hélt einum í tökum og einn var enn á vettvangi þegar lögreglu bar að og handtók mennina. Glöggar myndir náðust með öryggismyndavélum af hinum tveimur og er vitað hverjir það eru. Öryggisvörðurinn var útskrifaður af slysadeild að aðhlynningu lokinni.