Ekki lagaheimild til að afhenda slitabúunum bankana

Steingrímur J. Sigfússon, þáverandi fjármálaráðherra, hafði ekki heimild til að afhenda slitabúum föllnu bankanna eignarhluti ríkisins í Arion banka og Íslandsbanka árið 2009. Þetta kemur fram í umsögn Bankasýslu ríkisins um frumvarp Bjarna Benediktssonar, núverandi fjármálaráðherra.

Morgunblaðið greinir frá þessu og segist vera með umrædda umsögn undir höndum. Í umsögninni vísar bankasýslan í álit ríkisendurskoðunar um að samkomulag ríkisins við skilanefndir bankanna um yfirtöku á eignarhlutunum teldist til ráðstöfunar á eignum ríkisins. Því hefði þurft að afla heimildar í fjárlögum vegna framsalsins.

Morgunblaðið segir einnig að í umsögninni sé ráðuneytisstjóri fjármála- og efnahagsráðuneytisins sakaður um að hafa beitt forstjóra Bankasýslunnar óeðlilegum þrýstingi við val á stjórnarformanni fjármálastofnunar í eigu ríkisins.