Sakar seðlabankastjóra um hræðsluáróður

Formaður Starfsgreinasambandsins sakar seðlabankastjóra um hræðsluáróður og segir fátt geta komið í veg fyrir verkfallsaðgerðir í næstu viku. Hann segir útilokað að fallast á sáttatilboð Samtaka atvinnulífsins.

Samtök atvinnulífsins lögðu í síðustu viku fram sáttatilboð í deilu þeirra við Starfsgreinasambandið en þeir segja að tilboðið feli í sér 23,5 prósenta hækkun dagvinnulauna á samningstímanum.

Starfsgreinasambandið hefur gagnrýnt þessa útreikninga og Drífa Snædal framkvæmdastjóri sambandsins sakaði SA um blekkingar í samtali við Fréttablaðið í síðustu viku. Björn Snæbjörnsson formaður sambandsins tekur í sama streng og segir útilokað að fallast á þetta tilboð.

„Þetta er þriggja ára samningur sem gerir ráð fyrir 30 þúsund króna hækkun. Svo áttu að fara að kaupa yfirvinnu og lengingu á dagvinnu til þess að fá einhver átta prósent þannig að þetta er ekki allt gull sem glóir þó það sé hægt að finna einhverja háa prósentutölu,“ segir Björn.

Næstu verkfallsaðgerðir Starfsgreinasambandsins hefjast á þriðjudag í næstu viku og standa í tvo daga. Boðað hefur verið til sáttafundar á mánudag en  Björn segir fátt benda til þess að hægt verði að koma í veg fyrir verkföll.

„Það er hægagangur í málinu og staðan mjög erfið,“ segir Björn. 

Már Guðmundsson seðlabankastjóri sagði í fréttum Stöðvar tvö í gær að miklar launahækkanir muni hafa slæm áhrif á vinnumarkaðinn og jafnvel leiða til aukins atvinnuleysis. Björn sakar seðlabankastjóra um hræðsluáróður.

„Þetta er að hluta til bara hræðsluáróður. Það er verið að reyna að hræða okkur. Ég hef ekki heyrt hann tala um þetta í tengslum við það sem aðrir hafa verið að fá og menn voru búnir að búa til ákveðna launastefnu áður en við fórum af stað,“ segir Björn.